گوگل نے صارفین کی خریداری کو تیز، آسان اور زیادہ اسمارٹ بنانے کے لیے نئے اے آئی پر مبنی شاپنگ فیچرز متعارف کرا دیے ہیں، جن میں ایجنٹک چیک آؤٹ، اے آئی کالنگ، اور جیمینائی ایپ میں شاپنگ اسسٹنٹ شامل ہیں۔
کمپنی کے مطابق یہ فیچرز صارفین کے وقت کی بچت، خریداری کے عمل کو آسان اور اسمارٹ بنانے کے لیے ڈیزائن کیے گئے ہیں۔
گوگل سرچ میں اب صارفین ایسے سوالات کر سکیں گے جیسے وہ کسی دوست سے بات کر رہے ہوں، اے آئی موڈ نہ صرف فوری تجاویز پیش کرے گا بلکہ قیمتیں، ریویوز، دستیابی اور موازناتی ٹیبلز بھی دکھائے گا، تاکہ صارف بہتر فیصلہ کر سکے، یہ فیچر گوگل کے شاپنگ گراف پر مبنی ہے، جس میں 50 بلین سے زیادہ پراڈکٹس کی معلومات موجود ہیں۔
گوگل کے مطابق جیمینائی ایپ کو بھی شاپنگ کے لیے اپ ڈیٹ کیا گیا ہے، صارفین اب ایپ کے اندر ہی پراڈکٹس براؤز کر سکتے ہیں، قیمتوں کا موازنہ کر سکتے ہیں اور مختلف اسٹورز سے دستیابی چیک کر سکتے ہیں۔ یہ سہولت فی الحال امریکہ میں دستیاب ہے اور صارفین کو ایک چیٹ میں مکمل شاپنگ تجربہ فراہم کرتی ہے۔
گوگل نے ایک اور دلچسپ فیچر متعارف کرایا ہے جسے گوگل کال کرے (Let Google Call) کہا گیا ہے، اگر صارف کسی پراڈکٹ کے لیے فوری دستیابی جاننا چاہے تو اے آئی اس کی جانب سے قریبی اسٹورز سے رابطہ کرے گا، یہ کال اسٹاک، قیمت اور ڈسکاؤنٹس کی معلومات فراہم کرے گی اور نتائج صارف کو ای میل یا ٹیکسٹ کے ذریعے بھیجے جائیں گے۔ فی الحال یہ فیچر کھلونے، ہیلتھ اینڈ بیوٹی، اور الیکٹرانکس کی کیٹیگریز کے لیے دستیاب ہے۔
گوگل کے مطابق یہ اے آئی فیچرز صارفین کے لیے خریداری کے عمل کو زیادہ آسان، تیز اور ذہین بنانے کے لیے تیار کیے گئے ہیں، تاکہ چھٹیوں کے مصروف موسم میں بھی شاپنگ کے تجربے کو خوشگوار بنایا جا سکے۔
