سیسی اور CLICK کےمنصوبہ SBOSS کے ذریعہ آجران کی
آن لائن رجسٹریشن سے متعلق اجلاس
کراچی(اسٹاف رپورٹر) سندھ ایمپلائز سوشل سیکورٹی انسٹی ٹیوشن اور CLICK کے منصوبہ سندھ بزنس ون اسٹاپ شاپ (SBOSS) کے ذریعہ سیسی میں آجران کی رجسٹریشن کے عمل کو آن لائن کے ذریعہ کرنے کے حوالے سے ایک اجلاس سندھ سوشل سیکورٹی ہیڈ آفس میں منعقد ہوا۔ اجلاس میں CLICK کے سینئر آٹومیشن اسپیشلسٹ طاہرعلی خان ، سندھ انفارمیشن ڈیپارٹمنٹ کے سینئر منیجر آصف کریم نے اجلاس میں بتایا کہ CLICK جو کراچی میں شہرکی ترقی کے لیے کام کر رہا ہے۔ SBOSS اس کے پروگرام کا ایک حصہ ہے، جو ورلڈ بینک کے تعاون سے چلایا جارہا ہے،جس کا مقصد کراچی کی ترقی اور خاص طور پر کاروبار کے لیے سرکاری طریقہ کار کو آسان بنانا ہے، یہ منصوبہ خاص طور پر سندھ بھر میں کاروبار شروع کرنے یا چلانے کے عمل کو آسان بنانے کے لیے ڈیزائن کیا گیا ہے۔ کمشنر سیسی صفدر حسین رضوی نے اس پروگرام میں سندھ ایمپلائز سوشل سیکورٹی انسٹی ٹیوشن کے مکمل تعاون کا یقین دلاتے ہوئے کہا کہ ہمارابنیادی مقصد محنت کشوں کو سماجی تحفظ کے زیادہ سے زیادہ فوائد کو آسان و جدید طریقے سے محنت کشوں تک پہنچانا ہے۔ اس موقع پر سیسی کے لوکل ڈائریکٹوریٹس کے ڈائریکٹرز کو اس پروگرام کے ذریعہ آجران کی آن لائن رجسٹریشن کے طریقہ کار پر مکمل بریفنگ دی گئی، جب کہ SBOSS پروگرام کے حوالے سیسی کے فوکل پرسن اور ڈائریکٹر پبلک ریلیشنز وسیم جمال اور ڈائریکٹر سی اینڈ بی ڈاکٹر غلام دستگیر نے CLICK کی ٹیم کو اس پروگرام میں سیسی کو آنے والی مختلف ٹیکنیکل مشکلات سے آگاہ کیا، جسے باہمی مشاورت سے حل کرنے کا فیصلہ کیا گیا۔ اجلاس میں سیسی کے ڈائریکٹرزآفتاب عالم، نادرکناسرو، سیف اللہ خان، علی حیدرزیدی ، علی اکبر منگی، ڈپٹی ڈائریکٹر آصف قائم خانی اور کمپیوٹر پروگرامر حامد علی نے شرکت کی۔
