جنات کی جانب سے 6 سال قبل مبینہ اغوا کی گئی فوزیہ بی بی کو تلاش کرنے والے کیلیے 5 لاکھ انعام کا اعلان کر دیا گیا۔
اے آر وائی نیوز کے مطابق لاہور کے علاقہ کاہنہ میں 6 سال قبل فوزیہ بی بی نامی خاتون لاپتہ ہوئی تھی۔ خاتون کی والدہ نے جنات کی جانب سے ان کی بیٹی کو مبینہ اغوا کا الزام عائد کیا گیا تھا۔ اب اس خاتون کو تلاش کر کے لانے والے کیلیے 5 لاکھ روپے انعام کا اعلان کر دیا گیا ہے۔
خاتون کی تلاش میں ناکام پولیس نے کچے کا علاقہ بھی چھان مارا ہے اور وہاں 180 کے قریب پوسٹرز چسپاں کرنے کے علاوہ مختلف سرداروں اور جیل کے سربراہوں سے بھی رابطہ کیا ہے۔
فوزیہ بی بی کی تلاش کے لیے نادرا سے مدد حاصل کی گئی، تاہم اس میں بھی کوئی مثبت پیش رفت سامنے نہیں آ سکی ہے۔
خاتون کی تلاش کے دوران پولیس نے 15 اافراد کے پولی گرافک ٹیسٹ اور 673 نمبرز کا ڈیٹا بھی حاصل کیا جب کہ سوات چھانگلہ کا ایک نمبر مشکوک پایا گیا۔ تاہم پولیس کو وہاں بھی کوئی کامیابی نہ مل سکی۔
اوکاڑہ سے پولیس کو گمنام خط موصول ہوا، جب اس کی مکمل چھان بین کی گئی تو نتیجہ وہی صفر رہا۔ پولیس نے مذکورہ کیس میں 73 افراد کو ایک بار پھر شامل تفتیش کر لیا گیا ہے۔
جنات کی جانب سے مبینہ اغوا خاتون فوزیہ بی بی کا نہ شناختی کارڈ بنا ہوا ہے اور نہ ہی اس کے لاپتہ ہوتے وقت اس کے پاس کوئی موبائل فون تھا، جس کے باعث پولیس کیلیے اس کا سراغ لگانا چیلنج بن چکا ہے۔
واضح رہے کہ فوزیہ جو 6 سال قبل لاپتہ ہوئی تھی۔ اس کی والدہ نے بیٹی کے سسرالیوں کے خلاف مقدمہ درج کرایا تھا اور الزام عائد کیا تھا کہ سسرالیوں نے جنات کے ذریعہ اس کی بیٹی کو اغوا کرایا ہے۔
