شاہینہ شیر علی نے بیوٹیشن، مہندی، سلائی اور آئی ٹی کورس مکمل کرنے والی طالبات میں سرٹیفکیٹس اور سلائی مشینیں تقسیم کیں
کراچی 09نومبر ۔ صوبائی وزیر ترقیِ نسواں سندھ شاہینہ شیر علی سندھ حکومت خواتین کو بااختیار بنانے کے لیے ہر سطح پر عملی اقدامات کررہی ہے جبکہ اچھی تعلیم و تربیت کے ساتھ ہنر مندی خواتین کی معاشی خود مختاری کی بنیاد ہیں اور جو ادارے بچیوں اور خواتین کی فنی تعلیم پر کام کررہے ہیں ہم انھیں ہرممکن تعاون فراہم کریں گے۔ ان خیالات کا اظہار انھوں نے لیاری میں کچھی کمبھار خدمتِ خلق ویلفیئر ایسوسی ایشن کے تحت ووکیشنل ٹریننگ انسٹیٹیوٹ میں منعقدہ ایوارڈز تقسیم کی تقریب میں خصوصی شرکت اور خطاب کرتے ہوئے کیا۔ اس موقع پر لیاری ٹاؤن کے چیئرمین ناصر کریم، صدر ایسوسی ایشن رفیق مارا، خواتین وِنگ کی کنوینر نوشین جاوید ، معززین علاقہ و دیگر کی بڑی تعداد شریک تھی۔ تقریب سے خطاب میں صوبائی وزیر شاہینہ شیر علی نے کچھی کمبھار خدمتِ خلق ویلفیئر ایسوسی ایشن کی جانب سے بچیوں و خواتین کے لیے ووکیشنل سینٹرز کرنے اور فنی تعلیم فراہم کرنے اور خواتین کی فلاح و بہبود کے لیے لیڈیز ونگ کی بنیاد رکھنے پر انکی خدمات کو سراہا۔ انھوں نے کہا کہ منتظمین کو یقین دلایا کہ خواتین کی فلاح و بہبود کے لیے بہترین اقدامات پر سندھ حکومت تنظیم کے شانہ بشانہ ہے اور انھیں ہر ممکن تعاون فراہم کیا جائے گا۔ بعد ازاں صوبائی وزیر شاہینہ شیر علی نے بیوٹیشن، مہندی، سلائی اور آئی ٹی کورس مکمل کرنے والی طالبات میں سرٹیفکیٹس اور سلائی مشینیں بھی تقسیم کیں۔
ہینڈآؤٹ نمبر 1255۔۔۔ایس اے بی
