امریکی قائم مقام سفیر نیٹلی بیکر کا گولڑہ ریلوے سٹیشن اور میوزیم کا دورہ
نیوز ڈیسک
November 09, 2025
اسلام آباد: امریکہ کی قائم مقام سفیر نیٹلی بیکر نے گولڑہ ریلوے سٹیشن اور ریلوے میوزیم کا خصوصی دورہ کیا۔وفاقی وزیر ریلوے محمد حنیف عباسی نے نیٹلی بیکر کو گولڑہ سٹیشن، قائداعظمؒ سالون اور تاریخی ریلوے میوزیم کا تفصیلی دورہ کرایا۔
میوزیم میں رکھی گئی 19ویں اور 20ویں صدی کی امریکی ساختہ ریلوے مشینری اور آلات نے امریکی قائم مقام سفیر کی خاص توجہ حاصل کی۔وفاقی وزیر ریلوے نے گولڑہ سٹیشن کی تاریخی و ثقافتی اہمیت اور حالیہ اپ گریڈیشن سے متعلق بریفنگ دی جبکہ اپنے دورِ وزارت میں کیے جانے والے اصلاحاتی اقدامات اور جدید کاری کے منصوبوں سے بھی آگاہ کیا۔
محمد حنیف عباسی نے بتایا کہ لاہور، راولپنڈی، کراچی اور فیصل آباد کے ریلوے سٹیشنوں کو جدید طرز پر اپ گریڈ اور ڈیجیٹائز کیا جا چکا ہے۔انہوں نے مزید کہا کہ پاکستان ریلوے نے اپنی تاریخ کا پہلا “سیف اینڈ سمارٹ ریلوے سٹیشن” راولپنڈی میں قائم کیا ہے۔
نیٹلی بیکر نے وفاقی وزیر کے وژن اور قیادت میں جاری اصلاحات کو سراہا اور کہا کہ محمد حنیف عباسی ایک حقیقی “ریلوے ریفارمسٹ” ہیں جو ادارے کو جدید خطوط پر استوار کر رہے ہیں۔وزیر ریلوے نے کہا کہ پاکستان ریلوے نہ صرف قومی اثاثہ ہے بلکہ ثقافتی ورثے اور بین الاقوامی روابط کی علامت بھی ہے۔
اس پوسٹ کو شیئر کریں
