ایف آئی اے نے عمرہ ویزے کی آڑ میں غیر قانونی سمندر کے راستے اٹلی جانے کی کوشش ناکام بنادی، 5 مسافر آف لوڈ
09 نومبر ، 2025
کراچی( اسٹاف رپورٹر )ایف آئی اے نے عمرہ ویزے کی آڑ میں غیر قانونی سمندر کے راستے اٹلی جانے کی کوشش ناکام بناتے ہوئے 5 مسافروں کو آف لوڈ کر دیا۔ ایف آئی اے امیگریشن کے مطابق مسافروں میں راحید اللہ، عبدالحمید، عبدالشکور، اسماعیل اور احمد اللہ شامل ہیں۔ مسافروں کا تعلق، بنوں، پشاور، خیبر اور مہمند کے مختلف علاقوں سے ہے۔مسافر فلائٹ نمبر PA170 کے ذریعے سے عمرہ ویزے پر سعودی عرب جا رہے تھے ۔حکام کے مطابق امیگریشن کلیرنس کے دوران مسافروں کو مشکوک پایا گیا ۔ابتدائی تفتیش کے مطابق مسافر پشاور کے مختلف ایجنٹوں سے رابطے میں تھے اور مسافروں نے سعودی عرب سے مصر، لیبیا اور بعد ازاں غیر قانونی سمندر کے راستے اٹلی جانا تھا۔مسافروں نے اٹلی جانے کے لئے ایجنٹوں سے فی کس 45 لاکھ روپے میں معاملات طے کئے ہوئے تھے۔
=======================
امریکا میں وفاقی حکومت کے شٹ ڈاؤن کے اثرات کے باعث جمعے کو ملک میں ایک ہزار سے زائد پروازیں منسوخ ہو گئیں ،یہ اقدامات ایئر ٹریفک کنٹرولرز پر دباؤ کم کرنے کے لیے کیے گئے جو بغیر تنخواہ کے کام کر رہے ہیں۔اے ایف پی کے مطابق فیڈرل ایوی ایشن ایڈمنسٹریشن ( ایف اے اے)نے بتایا کہ چالیس ہوائی اڈوں پر پروازیں کم کی گئیں جن میں اٹلانٹا، نیویارک، ڈینور، شکاگو، ہیوسٹن اور لاس اینجلس کے بڑے ہوائی اڈے شامل ہیں۔
ایف اے اے کا کہنا ہے کہ ریگن نیشنل (واشنگٹن)میں مسافروں کو اوسطاً چار گھنٹے کی تاخیر کا سامنا کرنا پڑا جبکہ فینکس میں 90 منٹ اور شکاگو و سان فرانسسکو میں ایک گھنٹے کی تاخیر ہوئی۔امریکن ایئرلائنز کے سی ای او رابرٹ آئزوم نے کہا کہ یہ بہت پریشان کن ہے، ہمیں اس صورتحال میں نہیں ہونا چاہیے۔
فلائٹ اویئر کے مطابق جمعے کو ایک ہزار سے زائد پروازیں منسوخ ہوئیں۔
امریکی وزیرِ ٹرانسپورٹیشن شان ڈفی نے شٹ ڈاؤن کے لیے ڈیموکریٹس کو ذمہ دار قرار دیتے ہوئے کہا کہ انہیں حکومت کھولنے کے لیے ووٹ دینا چاہیے۔ صدر ڈونلڈ ٹرمپ نے بھی سینیٹ کے قانون سازوں سے اپیل کی کہ شٹ ڈاؤن ختم ہونے تک واشنگٹن میں رہیں۔امریکن ایئرلائنز روزانہ تقریباً 220 پروازیں منسوخ کر رہی ہے جبکہ ڈیلٹا نے جمعے کے لیے 170 اور ساؤتھ ویسٹ ایئرلائنز نے تقریباً 100 پروازیں منسوخ کی ہیں۔
ٹرمپ انتظامیہ نے مسافروں کو یقین دلایا ہے کہ پرواز محفوظ ہے، تاہم ہوابازی سے متعلق زیادہ دباؤ والے ملازمین اب بیمار ہو کر چھٹیاں لے رہے ہیں اور بعض دیگر کام کر کے اپنے اخراجات پورے کر رہے ہیں۔یاد رہے کہ جمعرات کو امریکا میں 6,800 سے زائد پروازیں تاخیر کا شکار رہیں اور تقریباً 200 منسوخ ہوئیں جس کے باعث مسافروں کو سکیورٹی چیک پوائنٹس پر طویل قطاروں کا سامنا کرنا پڑا
