وزیر بلدیات سندھ سید ناصر حسین شاہ نے روہڑی کے قریب اروڑ یونیورسٹی کے پاس قائم ایک جدید کیٹل کالونی کا افتتاح کیا۔ افتتاحی تقریب میں ڈسٹرکٹ کونسل سکھر کے چیئرمین سید کمیل حیدر شاہ، ڈپٹی کمشنر سکھر نادر شہزاد خان،
مالکان مویشی، میڈیا نمائندگان اور شہریوں کی بڑی تعداد نے شرکت کی۔افتتاحی تقریب سے خطاب اور میڈیا سے گفتگو کرتے ہوئے وزیر بلدیات سید ناصر حسین شاہ نے کہا کہ 58 ایکڑ پر محیط 61 کروڑ روپے کی لاگت تیار ہونے والا جدید سہولیات سے آراستہ روہڑی کیٹل کالونی کا یہ منصوبہ پاکستان پیپلز پارٹی کی عوام دوست پالیسیوں کا تسلسل ہے۔ یہ روہڑی کے عوام کے لیے ایک بڑا تحفہ ہے، جہاں مال مویشی رکھنے والوں کے لیے تمام سہولیات فراہم کی گئی ہیں۔ انہوں نے کہا کہ شہر کی سڑکوں پر قائم پرانے باڑوں کی وجہ سے عوام کو درپیش مشکلات کا خاتمہ کیا گیا ہے اور جانوروں کو باقاعدہ نئی کالونی میں منتقل کیا گیا ہے۔انہوں نے مزید کہا کہ مالکانِ مویشی کی حوصلہ افزائی کے لیے انہیں بغیر سود کے قرضے بھی دیے جائیں گے تاکہ وہ دودھ سے پنیر اور دیگر اشیاء تیار کرکے مارکیٹ سے زیادہ آمدنی حاصل کر سکیں۔ سید ناصر حسین شاہ نے کہا کہ چیئرمین بلاول بھٹو زرداری کی ہدایات اور وزیر اعلیٰ سندھ سید مراد علی شاہ کی قیادت میں سندھ میں جو ترقیاتی منصوبے شروع کیے گئے ہیں، ان میں 50 فیصد منصوبے صاف پینے کے پانی اور نکاسی آب سے متعلق ہیں۔انہوں نے ضلعی انتظامیہ کو ہدایت کی کہ سکھر اور روہڑی شہر میں جہاں بھی غیر قانونی باڑے موجود ہیں، ان کے خلاف کارروائی کی جائے اور انہیں کیٹل کالونی میں منتقل کیا جائے۔ وزیر بلدیات نے بتایا کہ روہڑی کیٹل کالونی میں بجلی کے لیے سولر سسٹم، مویشیوں کے لیے پینے کا پانی اور سکیورٹی سمیت تمام سہولیات دستیاب ہیں۔ انہوں نے کہا کہ ان کی کوشش ہے کہ یہ کیٹل کالونی پاکستان کی سب سے بڑی اور بہترین کیٹل کالونی بنے۔
