کراچی 4 نومبر ۔بابا گرو نانک کے 556ویں جنم دن کے موقع پر کراچی کے گردوارے میں وزیراعلیٰ کے معاونِ خصوصی اور محکمہ اقلیتی امور کے مشیر ڈاکٹر شام سندر آڈوانی بطورِ مہمانِ خصوصی شریک ہوئے،جہاں انہوں نے سکھ برادری کے افراد سے ملاقات کی۔اس موقع پر سکھ رہنما رمیس سنگھ خالصہ، لشمَن سنگھ، ارجن سنگھ، ستنام، سریش پیسوانی اور دیگر نے ڈاکٹر شام سندر آڈوانی کا پرتپاک استقبال کیا۔تقریب میں پارلیمانی سیکریٹری اور ایم پی اے روما مشتاق، محکمہ اقلیتی امور کے سیکریٹری انجم اقبال بھی موجود تھے۔ڈاکٹر شام سندر آڈوانی نے سکھ برادری کے غریب خاندانوں میں مالی امداد کے طور پر چیک تقسیم کیے۔انہوں نے کہا کہ انسانیت کی خدمت سب سے اعلیٰ درجہ رکھتی ہے، خواہ کوئی سکھ ہو، ہندو ہو یا مسیحی — سب کی خدمت ہمارا فرض
ہے۔انہوں نے مزید کہا کہ چیئرمین پیپلز پارٹی بلاول بھٹو زرداری کے دیے گئے مشن کے تحت سندھ حکومت اقلیتوں کی فلاح و بہبود کے لیے ہر وقت سرگرم ہے۔سندھ حکومت اقلیتوں کے ساتھ کھڑی ہے، ہم تمام خوشیوں کو مل کر منائیں گے، اور پاکستان امن و محبت کا عظیم مرکز ہے، ڈاکٹر شام سندر آڈوانی نے مزید کہا کہ صدر آصف علی زرداری ہمیشہ اقلیتوں کے حقوق کی بات کرتے رہے ہیں، اور ہم بلاول بھٹو کے دیے گئے وژن کو آگے بڑھا رہے ہیں۔
