باڈہ، (نامہ نگار):
نامور قانون دان، سندھ دَریا پر قبضے، کارپوریٹ فارمنگ سمیت سندھ دشمن منصوبوں کے خلاف عملی جدوجہد میں صفِ اوّل کا کردار ادا کرنے والے باڈہ مکین ایڈووکیٹ اطہر عباس سولنگی کو سندھ بار کونسل کے الیکشن میں اکثریت سے کامیابی حاصل کرنے پر باڈہ تعلقہ موومنٹ کے وفد نے لاڑکانہ میں سولنگی ہاؤس پہنچ کر پھولوں کے ہار اور اجرکیں پہنا کر مبارکباد پیش کی۔ باڈہ تعلقہ موومنٹ کے ڈپٹی کنوینرز زیب علی ساريو اور مفتی نصیر احمد بھٹو کی قیادت میں جانے والے وفد میں باڈہ کے مختلف مکاتبِ فکر سے وابستہ شخصیات شیعہ علماء کونسل رہنما مولانا محمد علی ایمانی، جماعت اہلسنت القاسمیہ رہنما حافظ محمود ساريو، سندھ بروہی اتحاد کے رہنما میر نور احمد زہری، باڈہ میڈیا ہائوس کے علی انور عسکری، محمد امین سیال، مظہر نوشاد فلپوٹو، باڈہ سوشل فورم کنوینر کامریڈ عزیز بروہی، چیمبر آف کامرس صدر علی شیر ساريو، سندھ ترقی پسند پارٹی رہنمائوں شمس الدین پنهور، کامریڈ اصغر نوناری، عالم بروہی، مولا بخش فلپوٹو، پی ٹی آئی رہنما ذوالفقار کاندھڑو، اقلیتی برادری کے مُکھیہ سیٹھ تارا مل، سیٹھ ککو مل، فنکار راجا سومرو، استاد اعجاز موريو، سندھ یونائیٹڈ پارٹی کے میر مرتضیٰ گوپانگ، پیپلز پارٹی شہید بھٹو کے رہنما فدا حسین تنيو، مزدور رہنما قاسم چنه اور دیگر شامل تھے۔ اس موقعے پر زیب علی ساريو، مفتی نصیر بھٹو اور دیگر رہنمائوں نے میڈیا سے بات کرتے ہوئے کہا کہ اطہر عباس سولنگی طالبِ علمی کے دور سے ہی ایک انقلابی سوچ رکھنے والے شخص ہیں۔ وہ ہمیشہ عملی جدوجہد پر یقین رکھتے ہیں۔ سندھ دَریا پر ناجائز قبضے اور کارپوریٹ فارمنگ کے نام پر سندھ کی زمینیں ہتھیانے کے خلاف اُن کی جدوجہد ناقابلِ فراموش ہے۔ یہی وجہ ہے کہ سندھ بار کونسل کے الیکشن میں انہیں برتری حاصل ہوئی۔ ان کی کامیابی صرف باڈہ کی نہیں بلکہ پوری سندھ کی کامیابی ہے۔ دوسری جانب باڈہ تعلقہ موومنٹ کے کنوینر علی محمد بروہی اور سینئر صحافی حمید ناز سومرو نے ٹیلیفون کے ذریعے ایڈووکیٹ اطہر عباس سولنگی کو کامیابی کی مبارکباد دیتے ہوئے کہا کہ جو شخص ذاتی مفادات کو پسِ پشت ڈال کر اجتماعی مسائل کے حل میں یقین رکھتا ہے، کامیابی ہمیشہ اسی کے قدم چومتی ہے۔ ایڈووکیٹ اطہر عباس سولنگی جس طرح سندھ کے حقوق کے مقدمے لڑ رہے ہیں، ہم انہیں سلام پیش کرتے ہیں۔ باڈہ کے شہری ہونے کے ناتے ہمیں ان پر ہمیشہ فخر رہا ہے اور رہے گا۔ جبکہ ایڈووکیٹ اطہر عباس سولنگی نے باڈہ تعلقہ موومنٹ کے وفد کا شکریہ ادا کرتے ہوئے کہا کہ میری سیاسی تربیت باڈہ شہر میں ہوئی ہے، جو انقلابی لوگوں کا شہر کہلاتا ہے۔ انہوں نے مزید کہا کہ باڈہ کو تعلقہ کا درجہ ضرور ملنا چاہیے جو اس کا بنیادی اور آئینی حق ہے۔ میں قانونی اعتبار سے اپنے شہریوں کے ساتھ ہمیشہ کھڑا رہوں گا۔ انہوں نے کہا کہ یہ کامیابی صرف میرے اکیلے کی نہیں بلکہ میرے وکیل ساتھیوں، باڈہ مکینوں اور بالخصوص سندھ کے مظلوم عوام کی کامیابی ہے۔ یہ کامیابی ہمیں سندھ کے مسائل کے خلاف جدوجہد سے ملی ہے، اور میں یقین دلاتا ہوں کہ سندھ کے مسائل کے خلاف ہمیشہ صفِ اوّل میں رہ کر اپنی جدوجہد جاری رکھوں گا۔
