پاکستان کے صوبہ بلوچستان میں پولیو وائرس کے خلاف نمایاں پیش رفت سامنے آئی ہے، جہاں وائرس کی ماحولیاتی نمونوں میں موجودگی انتہائی کم ہو گئی ہے۔
بلوچستان کے مجموعی طور پر 23 اضلاع میں سے 19 علاقوں کے ماحول سے پولیو وائرس مکمل طور پر ختم ہو چکا ہے۔ حکام کا کہنا ہے کہ تازہ ترین ٹیسٹ رپورٹ میں صرف 4 علاقوں میں وائرس کی موجودگی کی تصدیق ہوئی ہے۔
ایمرجنسی آپریشن سینٹر کی جانب سے جاری رپورٹ کے مطابق، گزشتہ سال کے مقابلے میں صوبے میں پولیو وائرس کی موجودگی میں قابل ذکر کمی آئی ہے، جو 98 فیصد سے کم ہو کر اب 17 فیصد رہ گئی ہے۔ کوآرڈینیٹر انعام الحق نے بتایا کہ اس سال بلوچستان میں پولیو کا کوئی نیا کیس سامنے نہیں آیا۔
انعام الحق نے وضاحت کی کہ 2024 کے دوران صوبے کے تمام 23 ماحولیاتی نگرانی مراکز میں پولیو وائرس کی موجودگی ریکارڈ کی گئی تھی۔ سال کی پہلی ششماہی میں ماحولیاتی نمونوں میں وائرس کی شرح 72 فیصد اور دوسری ششماہی میں 98 فیصد تھی۔ ستمبر 2024 میں وائرس کی شدت اپنی بلند ترین سطح پر پہنچی جب 95 فیصد نمونے مثبت پائے گئے۔
انہوں نے کہا کہ ماحولیاتی نمونوں میں وائرس کی کمی مثبت پیش رفت کی علامت ہے اور اس سے ظاہر ہوتا ہے کہ حفاظتی اقدامات اور مہمات کامیابی سے جاری ہیں۔
