پنجاب فوڈ اتھارٹی نے انسانی صحت سے کھیلنے والوں کے خلاف فیروز والا کے علاقے اومیگا ٹاؤن میں ایک اہم کارروائی کرتے ہوئے ایک کولڈ اسٹور سے 80 ہزار کلو گرام زائد المیعاد اور بدبودار فروزن ریڈی ٹو کُک گوشت برآمد کر کے موقع پر تلف کر دیا۔ یہ کارروائی وزیراعلیٰ پنجاب کی معاونِ خصوصی سلمیٰ بٹ کی نگرانی میں فوڈ سیفٹی ٹیموں نے کی۔
تفصیلات کے مطابق کولڈ اسٹور میں کلیجی، ونگز، لیگ پیس، اوجھڑیاں، گردن، پنچے اور دیگر ریڈی ٹو کُک اشیاء بوریوں میں غیر معیاری انداز میں ذخیرہ کی گئی تھیں۔ یہ گوشت نہ صرف بدبودار اور رنگت میں بگڑا ہوا تھا بلکہ حفظان صحت کے تمام اصولوں کے منافی درجہ حرارت پر رکھا گیا تھا۔
سلمیٰ بٹ نے میڈیا سے گفتگو میں کہا کہ یہ ناقص گوشت معروف فوڈ چینز، مارٹس اور بڑے ریسٹورنٹس کو سپلائی کیا جانا تھا، جس سے عوام کی صحت کو شدید خطرات لاحق ہو سکتے تھے۔ کولڈ اسٹور میں صفائی کے ناقص انتظامات، ایس او پیز کی خلاف ورزی، درجہ حرارت کنٹرول نظام کی عدم موجودگی اور خرید و فروخت کا ریکارڈ غائب پایا گیا۔
کارروائی کے دوران کولڈ اسٹور کے مالک کے خلاف مقدمہ درج کر کے اسے گرفتار کر لیا گیا۔ سلمیٰ بٹ نے واضح کیا کہ کسی سفارش یا دباؤ کو خاطر میں نہ لاتے ہوئے انسانی صحت سے کھلواڑ کرنے والوں کے خلاف سخت ایکشن لیا جائے گا۔ انہوں نے کہا کہ وزیراعلیٰ پنجاب مریم نواز کے وژن کے مطابق غذائی دہشتگردوں کو کسی صورت برداشت نہیں کیا جائے گا، اور مقررہ قوانین پر عملدرآمد نہ کرنے والوں کا کاروبار بند کر دیا جائے گا۔
