اسلام آباد اور لاہور کو ملانے والی موٹر وے پر چکری انٹرچینج کے قریب ایک افسوسناک واقعہ پیش آیا، جہاں ایک مسافر بس بے قابو ہو کر سڑک سے نیچے جا گری۔ اس حادثے میں 5 افراد جان کی بازی ہار گئے جبکہ 36 مسافر زخمی ہو گئے۔ بس لاہور کی طرف جا رہی تھی کہ حادثہ پیش آ گیا۔ حادثے کے بعد ریسکیو 1122 کی ٹیمیں فوراً موقع پر پہنچ گئیں اور زخمیوں کو فوری طبی امداد دے کر مختلف اسپتالوں میں منتقل کیا گیا۔ زخمیوں میں 22 افراد کو ڈی ایچ کیو چکوال، 8 کو پمز اسلام آباد اور 6 کو ڈی ایچ کیو راولپنڈی شفٹ کیا گیا۔ جاں بحق افراد کی میتیں بھی چکوال اور راولپنڈی کے اسپتالوں میں منتقل کی گئیں۔
دوسری طرف بہاولپور کی تحصیل حاصل پور میں بھی ایک دلخراش حادثہ پیش آیا۔ بہاولپور سے بہاولنگر جانے والی مسافر کوچ نے سامنے سے آنے والی کار کو ٹکر مار دی جس کے نتیجے میں کار میں سوار ایک ہی خاندان کے 5 افراد جاں بحق جبکہ 3 زخمی ہوگئے۔ ریسکیو ٹیم نے موقع پر پہنچ کر زخمیوں کو تحصیل ہیڈ کوارٹر اسپتال منتقل کیا۔ حادثے کی وجہ تیز رفتاری بتائی جا رہی ہے۔ کار میں خاندان کے 8 افراد موجود تھے جن میں سے 3 موقع پر دم توڑ گئے جبکہ 2 افراد اسپتال پہنچ کر جاں بحق ہوگئے۔
انتظامیہ نے شہریوں سے اپیل کی ہے کہ سفر کے دوران احتیاطی تدابیر پر عمل کریں تاکہ ایسے جان لیوا حادثات سے بچا جا سکے۔
