اسلام آباد میں ٹریفک قوانین کی پابندی یقینی بنانے اور خلاف ورزی کرنے والوں پر جرمانے عائد کرنے کے لیے ڈرون ٹیکنالوجی کا استعمال باقاعدہ طور پر شروع کر دیا گیا ہے۔
اسلام آباد ٹریفک پولیس نے ایکسپریس وے، سری نگر ہائی وے اور دیگر اہم سڑکوں پر ڈرونز کے ذریعے ٹریفک کی نگرانی کا نظام فعال کیا ہے۔ اس جدید نگرانی کے نتیجے میں اب تک 300 سے زیادہ ڈرائیوروں کو جرمانے کیے جا چکے ہیں جبکہ 350 سے زائد شہریوں کو ٹریفک قوانین سے متعلق رہنمائی فراہم کی گئی ہے۔
چیف ٹریفک آفیسر کیپٹن (ر) سید ذیشان حیدر کی سربراہی میں شروع کیے گئے اس اقدام کا مقصد ٹریفک قوانین پر سختی سے عمل درآمد کرانا ہے۔ حکام کے مطابق ڈرون کیمرے لین ڈسپلن کی خلاف ورزی، اوور لوڈنگ، خطرناک ڈرائیونگ اور ون وہیلنگ جیسے عمل پر نظر رکھتے ہیں۔
ڈرون سے حاصل ہونے والی ویڈیوز کی مدد سے قانونی کارروائی کی جا رہی ہے جبکہ قوانین توڑنے والی متعدد گاڑیاں بھی تھانوں میں بند کی گئی ہیں۔ حکام نے کہا ہے کہ شہریوں کو قوانین پر عمل کرنے کی تاکید کی جا رہی ہے تاکہ سڑکوں پر حادثات اور خطرناک ڈرائیونگ کو روکا جا سکے۔
