امریکی ٹیکنالوجی کمپنی ایپل نے اپنے پہلے فولڈ ہونے والے آئی فون کی تیاری کا آغاز کر دیا ہے، جو سال دو ہزار چھبیس میں مارکیٹ میں پیش کیا جائے گا۔
میڈیا رپورٹس کے مطابق ایپل کا یہ فولڈ ایبل آئی فون اسمارٹ فونز کی دنیا میں ایک بڑی تبدیلی کی علامت سمجھا جا رہا ہے۔ اس نئے ماڈل کے لیے جنوبی کوریا کی کمپنی سام سنگ ڈسپلے کو اس کا فولڈ ہونے والا پینل تیار کرنے کی ذمہ داری سونپی گئی ہے۔
اگرچہ ایپل اور سام سنگ عام طور پر ایک دوسرے کے سخت حریف مانے جاتے ہیں، لیکن اس منصوبے پر دونوں کا اکٹھے کام کرنا خاصا حیران کن ہے۔ سام سنگ کو او ایل ای ڈی اور فولڈ ہونے والی اسکرینوں کی ٹیکنالوجی میں دنیا بھر میں سبقت حاصل ہے اور اس نے اپنی گلیکسی زیڈ سیریز کے ذریعے فولڈ ایبل آلات متعارف کرا کے دنیا کو حیران کیا تھا۔
عام طور پر ایپل اپنی مصنوعات کے پرزے مختلف ممالک کی کمپنیوں سے تیار کرواتا ہے تاکہ کسی ایک سپلائر پر انحصار نہ ہو، لیکن اس معاملے میں آنے والے برسوں تک سام سنگ ڈسپلے ہی ایپل کے فولڈ ایبل پینلز کا خصوصی فراہم کنندہ رہے گا۔
اس نئے فولڈ ہونے والے آئی فون کی مکمل تفصیلات ابھی راز میں رکھی گئی ہیں، تاہم بتایا جا رہا ہے کہ اس میں سات اعشاریہ اٹھاون انچ کی اسکرین ہوگی، جس کا منفرد تناسب چودہ اعشاریہ ایک بہ دس ہوگا، اور اس کی ریزولیوشن دو ہزار سات سو تیرہ ضرب انیس سو بیس پکسلز ہوگی۔
امکان ہے کہ ایپل اس فون کو ایک عام اسمارٹ فون اور ایک چھوٹے ٹیبلٹ کے درمیان ایک مشترکہ شکل میں پیش کرے گا، بالکل اسی طرح جیسے سام سنگ کی گلیکسی زیڈ فولڈ سیریز ہے۔
