صوبائی دارالحکومت لاہور کے مشہور تجارتی مرکز حفیظ سینٹر میں آگ بھڑک اُٹھی۔ ابتدائی اطلاعات کے مطابق خوش قسمتی سے کسی شخص کے زخمی یا ہلاک ہونے کی خبر نہیں ملی۔ واقعے کی اطلاع ملتے ہی ریسکیو 1122 اور فائر بریگیڈ کی ٹیمیں موقع پر پہنچ گئیں اور آگ پر قابو پانے کی کوششیں شروع کر دیں۔ بتایا جا رہا ہے کہ گلبرگ میں واقع اس معروف پلازہ میں دوپہر کے وقت اچانک آگ بھڑکی، جس سے بیسمنٹ میں دھواں پھیل گیا۔
ریسکیو حکام کے مطابق آگ بجھانے کیلئے ریسکیو کی پانچ گاڑیاں موقع پر کام کر رہی ہیں جبکہ فائرفائٹرز پوری کوشش میں مصروف ہیں۔ ابتدائی خیال یہی ہے کہ آگ شارٹ سرکٹ کی وجہ سے لگی۔
ٹریفک پولیس نے بھی لبرٹی کی طرف آنے والی گاڑیوں کا راستہ تبدیل کر دیا ہے اور شہریوں کو متاثرہ علاقے سے دور رہنے کی ہدایت کی گئی ہے۔ یاد رہے کہ کچھ عرصہ قبل لاہور ہی کے میو ہسپتال کی او پی ڈی میں بھی آگ لگنے کا واقعہ پیش آیا تھا۔
اس واقعے کی اطلاع ملتے ہی ریسکیو ٹیمیں حرکت میں آ گئی تھیں اور آگ پر جلد قابو پا لیا گیا تھا۔ خوش قسمتی سے میو ہسپتال کی آگ سے بھی کوئی جانی نقصان نہیں ہوا تھا۔ ریسکیو ذرائع کے مطابق یورالوجی وارڈ میں آگ لگنے کے وقت کئی مریض اور عملہ موجود تھا، جس سے کچھ دیر کیلئے افراتفری پھیل گئی تھی۔
ریسکیو عملے نے فوری طور پر مریضوں کو محفوظ مقام پر منتقل کر دیا تھا اور چند منٹ میں آگ مکمل طور پر بجھا دی گئی تھی۔ ہسپتال انتظامیہ نے کہا تھا کہ آگ لگنے کی وجوہات جاننے کیلئے تحقیقات شروع کر دی گئی ہیں اور آئندہ ایسے واقعات کی روک تھام کیلئے حفاظتی انتظامات مزید سخت کیے جائیں گے۔
