پنجاب کے دارالحکومت لاہور میں مون سون کی غیر معمولی بارش نے تقریباً آٹھ گھنٹے تک جاری رہ کر نیا ریکارڈ قائم کر دیا۔ میڈیا رپورٹس کے مطابق علی الصبح 4 سے 5 بجے کے درمیان شروع ہونے والی موسلادھار بارش سے سب سے زیادہ نشتر ٹاؤن میں 178 ملی میٹر اور اقبال ٹاؤن ڈویژن اور پانی والا تالاب کے علاقوں میں 175 ملی میٹر بارش ریکارڈ کی گئی۔ شہر بھر میں اوسطاً 136 ملی میٹر بارش ہوئی۔ اس دوران واسا سمیت متعلقہ ادارے بارش کے پانی کی نکاسی کے لیے پوری طرح متحرک رہے، لیکن بجلی کی بار بار بندش کے باعث نکاسی کے عمل میں رکاوٹ کا سامنا کرنا پڑا جسے حل کرنے کی کوششیں جاری ہیں۔
مزید بتایا گیا ہے کہ لاہور کے مختلف علاقوں بشمول لکشمی چوک، گڑھی شاہو، سول سیکرٹریٹ، سمن آباد، ماڈل ٹاؤن، جوہر ٹاؤن، نشتر ٹاؤن، ٹھوکر نیاز بیگ اور کاہنہ میں موسلادھار بارش کے باعث کئی نشیبی علاقے پانی میں ڈوب گئے۔ شدید بارش نے شہر کا بجلی کا نظام بھی متاثر کیا، لیسکو کے 260 سے زائد فیڈرز ٹرپ کرگئے جس کی وجہ سے کئی علاقوں میں بجلی کی فراہمی معطل رہی اور شہریوں کو مشکلات کا سامنا کرنا پڑا۔
محکمہ موسمیات کے مطابق مون سون بارشوں کا یہ سلسلہ 13 جولائی تک جاری رہ سکتا ہے۔ اس صورتحال کے پیش نظر پی ڈی ایم اے پنجاب نے صوبے بھر میں الرٹ جاری کر دیا ہے۔ ڈائریکٹر جنرل پی ڈی ایم اے نے تمام ڈپٹی کمشنرز کو ہدایت دی ہے کہ نشیبی علاقوں میں پانی کی نکاسی کو یقینی بنایا جائے، ہنگامی صورتحال کے لیے مشینری اور عملہ ہر وقت تیار رکھا جائے اور کسی بھی علاقے میں پانی جمع نہ ہونے دیا جائے۔
