دبئی میں بغیر ڈرائیور چلنے والی کاریں متعارف کرانے سے پہلے تمام تجرباتی مراحل کی تیاریاں مکمل کر لی گئی ہیں۔
اس حوالے سے دبئی روڈز اینڈ ٹرانسپورٹ اتھارٹی نے خود مختار ڈرائیونگ ٹیکنالوجی میں مہارت رکھنے والی معروف کمپنی
Pony.ai
کے ساتھ ایک مفاہمتی یادداشت پر دستخط کیے ہیں، جس کے تحت ایمریٹس میں بغیر ڈرائیور گاڑیوں کا پائلٹ ٹرائل شروع کیا جائے گا۔
یہ آزمائشی منصوبہ اسی سال کے آخر میں شروع ہوگا، جس کے نتائج کی بنیاد پر 2026 میں بغیر ڈرائیور کمرشل سروس باقاعدہ طور پر متعارف کرائی جائے گی۔
یہ شراکت دبئی کی سمارٹ سیلف ڈرائیونگ ٹرانسپورٹ حکمت عملی کی جانب ایک اہم پیش رفت ہے، جس کا ہدف ہے کہ 2030 تک شہر میں ہونے والے 25 فیصد سفر خود مختار گاڑیوں کے ذریعے کیے جائیں۔
مفاہمتی یادداشت پر دستخط کی باضابطہ تقریب میں آر ٹی اے کے ڈائریکٹر جنرل اور ایگزیکٹو بورڈ کے چیئرمین مطر الطائر اور
Pony.ai
کے چیف فنانشل آفیسر ڈاکٹر لیو وانگ موجود تھے۔
آر ٹی اے کی طرف سے معاہدے پر پبلک ٹرانسپورٹ ایجنسی کے سی ای او احمد ہاشم بہروزیان نے دستخط کیے، جبکہ
Pony.ai
کی نمائندگی اسٹریٹجی اینڈ بزنس ڈیولپمنٹ کی نائب صدر این شی نے کی۔
اس موقع پر دونوں اداروں کے اعلیٰ حکام نے بھی شرکت کی اور اس منصوبے کو دبئی کے جدید اور پائیدار ٹرانسپورٹ سسٹم کی سمت میں اہم قدم قرار دیا۔
