کائنات کے دور دراز گوشوں میں ہونے والے شدید دھماکوں کے نتیجے میں دو ایسے چمکتے ہوئے ستارے آسمان پر ظاہر ہوئے ہیں جنہیں زمین سے ننگی آنکھوں سے بھی دیکھا جا سکتا ہے۔
ماہرینِ فلکیات کا کہنا ہے کہ ریکارڈ شدہ تاریخ میں پہلی مرتبہ ایسا واقعہ پیش آیا ہے کہ آسمان پر ایک ساتھ دو نووا (نئے ستارے) نمودار ہوئے ہوں، جو اپنی غیر معمولی چمک سے زمین والوں کو حیران کر رہے ہیں۔
پہلے ستارے کو سائنس دانوں نے
V462 Lupi
کا نام دیا ہے، جسے پہلی بار 12 جون کو ’لُوپس‘ نامی جھرمٹ میں دیکھا گیا۔ ماہرین کے مطابق اس کی روشنی دھماکے سے پہلے موجودہ روشنی سے 30 لاکھ گنا کم تھی۔
اس کے بعد 25 جون کو فلکیات کے ماہرین نے ایک اور نووا کو دریافت کیا، جسے
V572 Velorum
کا نام دیا گیا ہے اور یہ ’ویلا‘ نامی جھرمٹ میں موجود ہے۔
ماہرین کہتے ہیں کہ عام طور پر سال بھر میں اس نوعیت کا ایک ہی نووا نمودار ہوتا ہے، مگر بیک وقت دو نووا کا ظاہر ہونا انتہائی غیر معمولی بات ہے اور فلکیات کی دنیا کے لیے ایک دلچسپ حیرت بن گیا ہے۔
