کراچی ( )آرٹس کونسل آف پاکستان کراچی کے زیراہتمام معروف فلم میکر، ڈائریکٹر ، ڈیجیٹل و میڈیا پروفیشنل فرقان ٹی صدیقی کی یاد میں تقریب کا انعقادحسینہ معین ہال میں کیا گیا ، تقریب کا آغاز تلاوت کلام پاک سے کیا گیا،جبکہ صدر آرٹس کونسل محمد احمد شاہ ،چیئرمین میوزک کمیٹی امجد حسین شاہ ، ندیم جعفری ، کامران جیلانی ، جبران ٹی صدیقی ،سہیل ہاشمی، احمد سلیم صدیقی ، محسن نقوی ، ڈاکٹر ندرت ، فرحان قیصر ، علی زمان ،ڈاکٹر شہزاد علی غازی ، علیم شیخ ، عمران رضا نقوی ، ریحان صدیقی ، سکینہ ثروت ، علی چشتی ، ندیم جے، یونس میمن ، اظفر رضا سمیت فرحان ٹی صدیقی کے تینوں بیٹوں نے اپنے خیالات کا اظہار کیا ،اس موقع پر صدر آرٹس کونسل محمد احمد شاہ نے کہا کہ فرقان سے میرا گہرا تعلق تھا،وہ محبت کرنے والا، سچا اور ہمہ جہت انسان تھا۔آج بھی ایسا محسوس ہوتا ہے جیسے فرقان ہمارے درمیان موجود ہے ،فرقان کے جانے سے انڈسٹری میں بہت بڑا خلا پیدا ہو چکا ہے ، فرقان لوگوں کو جوڑنے کا ہنر رکھتا تھا ان کی آرٹس کونسل سے بھی گہری وابستگی رہی۔آرٹس کونسل اور پوری گورننگ باڈی فرقان کے اہل خانہ کے غم میں برابر کی شریک ہے۔چیئرمین میوزک کمیٹی امجد حسین شاہ نے کہا کہ فرقان ایک پرخلوص اور مسکراہٹ بکھیرنے والی شخصیت کا نام تھا، انہوں نے ہمیشہ دوسروں کا خیال رکھا اور اپنی تکلیف کو دل میں چھپائے رکھا، ان کا اس دنیا سے چلے جانا نہ صرف ان کے اہل خانہ بلکہ ہم سب کے لیے بہت بڑا نقصان ہے۔ندیم جعفری نے شوبز انڈسٹری کی تلخ حقیقت کی طرف اشارہ کرتے ہوئے کہاکہ ہم بے قدرے لوگ ہیں جب کوئی بیمار ہوتا ہے تو اس کے مرنے کا انتظار کرتے ہیں،ہمارے فنکار بکھرے ہوئے ہیں مگر کسی سے کہتے نہیں، فرقان ہمارا پیارا دوست ہم سے جدا ہوگیا ، جبران ٹی صدیقی نے کہا کہ فرقان بھائی کو آرٹس کونسل کراچی سے خاص محبت تھی ،ان رگوں میں کراچی دوڑتا تھا۔کم عمری میں فرقان نے پی ٹی وی میں قدم رکھ کر اپنی قابلیت کا لوہا منوایا، 24 مارچ کی رات ناقابل فراموش تھی۔ فرقان ہمیں یہ سکھا گئے کہ زندگی کا اصل مقصددوسروں کے کام آنا ہے۔ اداکار کامران جیلانی نے کہا کہ ایسا لگتا ہے کہ فرقان ابھی تصویر سے باہر نکل آئے گا، انہوں نے انڈسٹری اور دوستوں کے لئے بہت کچھ کیا مگر افسوس ہے کہ انڈسٹری نے ان کے ساتھ انصاف نہیں کیا، فرقان بہت ٹیلنٹڈ انسان تھا، انڈسٹری نے فرقان کے ساتھ بہت زیادتی کی ہے۔سہیل ہاشمی نے کہا کہ فرقان جس سے ملتے اسے اپنا بنا لیتے تھے، فرقان اپنے فن میں مہارت رکھتے تھے، ان میں جو صلاحیتیں کو کبھی فراموش نہیں کیا جاسکتا، تقریب میں معروف اداکار سید شہزاد رضا نقوی، اداکار عدنان شاہ(ٹیپو)، کامران جیلانی، تھیٹر ڈائریکٹرز، اسٹیج اداکار، صحافیوں سمیت ان کے رفقاءکی بڑی تعداد نے شرکت کی اور ان کی فنی خدمات کو خراج عقیدت پیش کیا ، تقریب کی نظامت کے فرائض اقبال لطیف نے انجام دئیے اور عظمی الکریم کا پیغام بھی پڑھ کر سنایا۔
