اردو یونیورسٹی کے ریٹائرڈ ملازمین کو وقت پر پنشن نہ ملنا شرمناک ہے: پاسبان
30-35سال کی خدمات کا صلہ کیا دھکے کھانا ہوتا ہے؟اعظم منہاس
بیوروکریٹس کو نوازا جا رہا ہے اور اساتذہ کو دھکے کھلائے جا رہے ہیں
پنشنرز سے رشوت لینے والوں کو سوچنا چاہیے کہ انہیں بھی ریٹائر ہونا ہے
کراچی ( ) پاسبان ڈیموکریٹک پارٹی کے وائس چیئرمین اعظم منہاس نے کہا ہے کہ ملازمین کی پنشنز اُن کا قانونی حق ہے، فوری جاری کی جائیں۔ ریٹائرڈ ملازمین کو وقت پر پنشن نہ ملنا شرمناک ہے۔ تیس پینتیس سال کی خدمات کا صلہ کیا دھکے کھانا ہوتا ہے؟ پنشنرز سے رشوت لینے والوں کو سوچنا چاہیے کہ انہیں بھی ریٹائر ہونا ہے۔ پنشن کے نظام کو نجی کمپنیوں کے حوالے کیا جائے۔ لوگ پنشن کے انتظار میں مر جاتے ہیں۔ یہ معاملہ بہت اذیت ناک اور فوری توجہ طلب ہے۔ سندھ حکومت بوڑھے لوگوں پر رحم کرے۔ پنشنزملازمین اور ان کی فیملیز کی زندگی کی بنیادی ضروریات پوری کرنے کا واحد ذریعہ ہے۔ موجودہ مالی دباؤ اور مہنگائی کے دور میں پنشن کی تاخیر انتہائی غیر انسانی اور ناقابلِ قبول ہے۔ پنشن کی بروقت ادائیگی کو یقینی بنانے کے لیے واضح نظام ترتیب دیا جائے۔ اس معاملے کی شفاف انکوائری کی جائے اور ذمہ دار افراد کے خلاف کارروائی عمل میں لائی جائے۔ وفاقی اردو یونیورسٹی کے درجنوں ریٹائرڈ اساتذہ، افسران اور دیگر ملازمین گزشتہ کئی ماہ سے مالی مشکلات کا شکار ہیں، کیونکہ انہیں ان کی پنشنز تاحال ادا نہیں کی گئیں۔ اردویونیورسٹی انتظامیہ اور متعلقہ حکومتی اداروں کی مسلسل عدم توجہی کے باعث بزرگ ملازمین علاج، بچوں کی تعلیم اور روزمرہ اخراجات جیسے مسائل سے دوچار ہیں۔ اس معاملے کی شفاف انکوائری کی جائے اور غفلت کے مرتکب افراد کے خلاف کارروائی کی جائے۔وزیراعلی سندھ، گورنر سندھ، اور وفاقی وزیرِ تعلیم اس معاملے کا فوری نوٹس لیں تاکہ متاثرین کو انصاف فراہم کیا جا سکے#
