حکومت پاکستان ، حکومت پنجاب اور ہائر ایجوکیشن کمیشن کی ہدایات پر آج 16 مئی 2025 کو پورے ملک کی طرح ،فاطمہ جناح میڈیکل یونیورسٹی ، لاہور میں بھی یوم تشکر ملی جوش و جذبے منایا گیا جس میں پاکستان کی سیکیورٹی فورسز اور عوام کو “آپریشن بُنْيَانٌ مَّرْصُوْصٌ “اور معرکہ حق میں کامیابی پر خراج تحسین پیش کیا گیا۔
اس موقع پر فاطمہ جناح میڈیکل یونیورسٹی میں وائس چانسلر پروفیسر خالد مسعود گوندل کی سربراہی میں ڈینز، تمام ڈیپارٹمنٹس کے سربراہان اور پروفیسرز کا اجلاس منعقد ہوا ۔
اس موقع پر وائس چانسلر کا کہناتھا کہ ہم آپریشن بُنْيَانٌ مَّرْصُوْصٌ اور معرکہ حق کی شاندار کامیابی پر افواج پاکستان اور پوری قوم کو مبارکباد پیش کرتے ہیں۔ ان کا کہنا تھا کہ پوری دنیا پاکستان کی کامیابی کو تسلیم کر رہی ہے۔پاکستانی قوم نے پوری دنیا کو یہ پیغام دیا ہے کہ پاکستان بحیثیت مسلم اُمہ متحد ہے اور ہر قسم کے حالات میں اپنی افواج کے ساتھ شانہ بشانہ کھڑی ہے ۔ انہوں نے معرکہ حق کے شہداء کو خراج عقیدت، ملک کی خاطر اپنی جانوں کا نذرانہ پیش کرنے والوں کے اہل خانہ کو خراج تحسین پیش کیا ۔
فاطمہ جناح میڈیکل یونیورسٹی کے آڈیٹوریم ہال میں وائس چانسلر پروفیسر خالد مسعود گوندل کی سربراہی میں ولولہ انگیز تقریب کا انعقاد بھی ہوا جس میں ڈینز ، فیکلٹی ممبران اور طالبات کی کثیر تعداد نے شرکت کی۔
شرکاء نے پاکستان کی سیکیورٹی فورسز کو والہانہ خراجِ عقیدت پیش کیا اور اس عزم کا اظہار کیا کہ آئندہ اگر دشمن کی جانب سے کوئی بزدلانہ کاروائی کی گئی تو پاکستانی قوم اپنی افواج کے ساتھ مل کر بھر پور جواب دے گی۔ فاطمہ جناح میڈیکل یونیورسٹی کی طالبات نے یوم تشکر کی مناسبت سے ملی نغمہ بھی پیش کیا۔
تقریب کے شرکاء نے طالبات کے ہمراہ”پاکستان ہمیشہ زندہ آباد ،پاک فوج زندہ آ باد، آپریشن بُنْيَانٌ مَّرْصُوْصٌ زندہ آ باد”کے فلک شگاف نعروں سے محبت کا اظہار کیا۔
اس موقع پر پرچم کشائی کی تقریب بھی منعقد ہوئی اور ملک و قوم کی سلامتی ،سیکیورٹی فورسز کی کامیابی اور شہداء کی مغفرت کے لیے خصوصی دعا بھی کی گئی۔
بعد ازاں فاطمہ جناح میڈیکل یونیورسٹی کی جامع مسجد میں جمعہ کی نماز کے بعد شکرانے کے نوافل ادا کیے گئے اور افواج پاکستان اور ملک و قوم کی سلامتی کے لیے دعا کی گئی بالخصوص شہداء کو خراج عقیدت پیش کرنے کے ساتھ درجات کی بلندی کی بھی دعا کی گئی۔شعبہ طب سے وابستہ احباب نے اس عزم کا اظہار کیا کہ ہم سب افواج پاکستان کے ساتھ شانہ بشانہ “بُنْيَانٌ مَّرْصُوْصٌ “کی عملی تصویر بنیں گے۔
