کراچی: ڈاؤ یونیورسٹی آف ہیلتھ سائنسز کے دونوں کیمپسز میں وزیراعظم شہباز شریف کی ہدایت پر افواج پاکستان سے اظہار یکجہتی اور معرکہ حق کےشہداء کی یاد میں یوم تشکر منایا گیا ڈاؤ میڈیکل کالج کیمپس میں اظہار تشکر کی ریلی کی قیادت قائم مقام وائس چانسلر پروفیسر جہاں آرا حسن نے کی اس موقع پر ان کے ساتھ رجسٹرار ڈاکٹر اشعرآفاق، ڈاؤ میڈیکل کالج کی پرنسپل صبا سہیل ،وائس پرنسپل شمائلہ خالد، ڈاؤ انٹرنیشل میڈیکل کالج کے پرنسپل پروفیسر افتخار احمد، پروفیسر ساجدہ قریشی ، پروفیسر زیبا احمد پروفیسر نواز لاشاری اور اساتذہ وطلبہ کی بڑی تعداد بھی موجود تھی پروفیسر جہاں آرا حسن نے کہا کہ افواج پاکستان نے قوم کا سر فخر سے بلند کر دیا ہے ہمیں اپنی افواج پر ناز ہے ڈاؤ یونیورسٹی سے اساتذہ و طلبہ سمیت تمام اسٹاف آج یوم تشکر منا رہے ہیں
رجسٹرار ڈاکٹر اشعر آفاق نے اس موقع پر کہا کہ یہ تاریخ میں ایک بہت بڑا موقع ہے جس نے قوم کو متحد کر دیا ہے فوج کے ساتھ ہم تیار کھڑے ہیں بھارتی جارحیت پرتمام ہیلتھ کیئر پروفیشنلزہنگامی حالات کے لیے تیار تھے۔ انہوں نے کہا کہ افواج پاکستان نے نہ صرف بھارتی جارحیت کا منہ توڑ جواب دیا بلکہ دشمن کے دانت بھی کٹھے کر دیے پرنسپل ڈاؤ میڈیکل کالج پروفیسر صبا سہیل نے کہا کہ ہماری بہادر افواج نے جس طرح حملے کاجواب دیا اور ملک کی حفاظت کا فریضہ سر انجام دیا اس طرح بطور ڈاکٹر ہم سب اپنے فرائض انجام دینے کے لیے ہمہ وقت تیار کھڑے ہیں طلبہ نے عطیہ خون کی مہم چلا کر عطیات جمع کیے دوران جنگ کسی بھی بڑی ایمرجنسی سے نمٹنے کے لیے ہمارے ہسپتال میں انتظامات مکمل کر لیے گئے تھے۔ ہیڈ آف کارڈیولوجی پروفیسر نواز لاشاری نے کہا کہ ہم سب نے پاک فوج کے ساتھ مل کر پاکستان کا دفاع کیا ہمارے اتحاد کی بدولت دشمن کو شکست ہوئی اور آئندہ بھی وہ ہماری طرف میلی آنکھ سے نہیں دیکھ سکے گا ریلی کے شرکاء نے ہاتھ میں قومی پرچم اور بینر اٹھائے ہوئے تھے ۔نعرےگونجے تو پورا ماحول حب الوطنی کے جذبے سے سرشار ہوگیاشریک نوجوان طلباء کے چہروں پر ملک سے محبت اور افواجِ پاکستان کے لیے غیر معمولی جذبات نمایاں تھےتقریب میں “پاک فوج زندہ باد”، “پاکستان پائندہ باد” اور “شہداء کو سلام” کے فلک شگاف نعرے بلند کیے گئے۔ طلباء نے ہاتھوں میں پاکستانی پرچم اور بینرز اٹھا رکھے تھے جن پر افواجِ پاکستان کے حق میں تحریریں درج تھیں۔ طلباء نے اظہارِ خیال کرتے ہوئے کہا کہ ہم اپنے محافظوں کو سلام پیش کرتے ہیں، جنہوں نے دشمن کے عزائم خاک میں ملا دیے۔ ہم ہر قدم پر اپنی فوج کے شانہ بشانہ کھڑے ہیں۔ تقریب کے اختتام پر افواجِ پاکستان، شہداء اور وطنِ عزیز کی سلامتی کے لیے خصوصی دعا کی گئی۔بعد ازاں اوجھا کیمپس کی جامع مسجد عائشہ اور ڈاؤ میڈیکل کالج سے متصل جامع مسجد سول اسپتال میں شہدا کے ایصال ثواب کے لیے قرآن خوانی بھی کی گئی
