یونیورسٹی آف ہیلتھ سائنسز (یو ایچ ایس) نے بی ایس نرسنگ کے چار سالہ پروگرام کے لیے مہارتوں پر مبنی نیا نصاب “کمپاس” کے نام سے متعارف کرا دیا جو اسی سال سے تمام الحاق شدہ نرسنگ کالجوں میں نافذ العمل ہوگا۔ اس کی منظوری جمعرات کے روز وائس چانسلر پروفیسر ڈاکٹر احسن وحید راٹھور کی زیر صدارت منعقدہ یو ایچ ایس بورڈ آف اسٹڈیز نرسنگ کے اجلاس میں دی گئی۔
نئے نصاب کے تحت کلینیکل کریڈٹ آورز کی تعداد تقریباً دگنی کردی گئی ہے۔ پہلے یہ کریڈٹ آورز 35 ہوتے تھے جنھیں اب بڑھا کر 54 کر دیا گیا ہے۔ اس طرح نرسنگ طلبہ کو اب ہفتے میں تین دن کلاسز اور تین دن ہسپتالوں میں تربیت دی جائے گی۔ طلبہ کی ہسپتالوں میں کلینیکل روٹیشنز پہلے ہی سال سے شروع ہوں گی۔
پاکستان میں پہلی بار نرسنگ کے نصاب میں کلچرل کمپیٹنسی سکلز کو شامل کیا گیا ہے جبکہ مجموعی طور پر طلبہ کو 200 سکلز اور 72 کورسز پڑھائے جائیں گے۔ یہ نصاب یو ایچ ایس کے میڈیکل ایجوکیشن اور نرسنگ ڈیپارٹمنٹس کی مشترکہ کاوش کا نتیجہ ہے۔
وائس چانسلر یو ایچ ایس کے مطابق فیکلٹی کی صلاحیتوں میں اضافے کے لیے یکم سے 15 جون تک خصوصی ورکشاپس منعقد کی جائیں گی جبکہ تعلیمی معیار کو برقرار رکھنے کے لیے یو ایچ ایس ہر سمسٹر میں نرسنگ کالجوں کے سرپرائز وزٹس بھی کرے گی۔
