بھارت نے جارحیت کی تو منہ توڑ جواب دیں گے، ڈی جی ISPR ،سیاسی جماعتوں کو طویل بریفنگ، PTI کا بائیکاٹ
05 مئی ، 2025
اسلام آباد – پاک بھارت کشیدگی کے معاملے پر وفاقی وزیرِ اطلاعات عطا اللّٰہ تارڑ اور ڈائریکٹر جنرل (ڈی جی) انٹر سروسز پبلک ریلیشن (آئی ایس پی آر) لیفٹیننٹ جنرل احمد شریف چوہدری سیاسی جماعتوں کے رہنماؤں کو بریفنگ دی۔ حکومتی ذرائع کے مطابق پہلگام فالز فلیگ آپریشن کے تناظر میں ہونے والے سیشن میں سیاسی جماعتوں کے رہنما بڑی تعداد میں شریک ہوئی، ڈی جی آئی ایس پی آر نے سیاسی جماعتوں کے شریک رہنماؤں کو پاک فوج کی تیاریوں سے آگاہ کیا۔ ذرائع نے بتایا کہ پاکستان ایک پُر امن ملک ہے اور خطے میں امن چاہتا ہے، لیکن اگر پاکستان پر جارحیت مسلط کی جاتی ہے تو افواج پاکستان دشمن کو منہ توڑ جواب دینے کیلئے تیار ہیں۔ علاوہ ازیں ذرائع کا مزید کہنا تھا کہ ان کیمرہ سیشن میں وفاقی وزیر اطلاعات و نشریات نے سیاسی قائدین کو حکومتی سفارتی اقدامات اور ریاستی موقف سے بھی آگاہ کیا۔بریفنگ میں سابق وزیراعظم آزاد کشمیر سردار عتیق ، جمعیت علماء اسلام کے نور عالم خان، عبدالشکو، وزیر مملکت برائے داخلہ طلال چوہدری، وزیر مملکت کھیل داس کوہستانی شریک ہیں جبکہ پاکستان تحریک انصاف نے حکومت کی بیک گراؤنڈ بریفنگ کا بائیکاٹ کیا ۔
https://e.jang.com.pk/detail/890996%22
حکومت نے موقع ضائع کیا، اے پی سی بلائی نہ مشترکہ بریفنگ کا اہتمام کیا، تحریک انصاف
05 مئی ، 2025FacebookTwitterWhatsapp
پشاور، اسلام آباد (اسٹاف رپورٹر،جنگ نیوز) پاکستان تحریک انصاف کی سیاسی کمیٹی کا پاک بھارت صورتحال پر حکومتی بریفنگ میں شرکت نہ کرنیکا اعلان کرتے ہوئے موقف اپنایا ہے کہ حالیہ حساس حالات میں حکومت کو فوری طور پر آل پارٹیز کانفرنس بلانی چاہیے تھی تاکہ تمام قومی جماعتوں کو اعتماد میں لیکر ایک مشترکہ لائحہ عمل ترتیب دیا جاتا مگر حکومت نے یہ موقع ضائع کیا،کسی بھی بیرونی جارحیت کی صورت میں ہم ملک اور قوم کے دفاع کیلئے صفِ اول میں کھڑے ہوں گے۔تحریک انصاف کے مرکزی ترجمان شیخ وقاص اکرم کے مطابق سیاسی کمیٹی اجلاس کے اعلامیہ میں کہ آگیا ہے کہ پاکستان تحریک انصاف نے ہمیشہ ہر قسم کی دہشت گردی اس کی ہر شکل، ہر صورت اور ہر مظہر کی دوٹوک اور غیر مبہم الفاظ میں مذمت کی ہے۔ عمران خان، جو اس وقت ناجائز طور پر قید میں ہیں، انہوں نے جیل سے بھی قوم کے نام اپنے پیغامات میں واضح طور پر نہ صرف دہشت گردی کی مذمت کی ہے بلکہ قومی یکجہتی، اتحاد اور داخلی استحکام کی ضرورت پر زور دیا ہے،تحریک انصاف کا واضح موقف ہے کہ کسی بھی بیرونی جارحیت کی صورت میں ہم ملک اور قوم کے دفاع کے لیے صفِ اول میں کھڑے ہوں گے۔ اس قومی مؤقف کو ہم نے اپنے یومِ تاسیس کے موقع پر بھی واضح کیا، جب پاکستان تحریک انصاف نے ایک باقاعدہ قرارداد منظور کی، جس میں پارٹی نے بھارتی جارحیت اور پروپیگنڈا سے متعلق اپنے اصولی مؤقف کو پوری قوم کے سامنے رکھا جو اس بات کی علامت ہے کہ تحریک انصاف ہر سطح پر قومی سلامتی، خودمختاری اور یکجہتی کے لیے سنجیدہ اور ہمہ وقت تیار ہے۔
بریفنگ میں شرکت کو عمران خان کی رہائی سے مشروط کرنا کوتاہ اندیشی، وزیر دفاع خواجہ آصف۔ بائیکاٹ ملک دشمنی کا ثبوت، عظمیٰ بخاری
05 مئی ، 2025FacebookTwitterWhatsapp
لاہور، اسلام آباد (خصوصی نمائندہ، ایجنسیاں) مسلم لیگ (ن) کا کہنا ہے کہ پاکستان تحریک انصاف کا ہر وقت ملک سے بائیکاٹ ہی انکا وطیرہ بن چکا ہے،یہ لوگ کبھی پاکستانی بن کر نہیں سوچ سکتے، وزیر اطلاعات پنجاب عظمیٰ بخاری نے کہا پی ٹی آئی والوں نے سیکورٹی بریفنگ میٹنگ کا بائیکاٹ کر کے ملک دشمنی کا ثبوت دیا ہے،وزیر مملکت برائے قانون و انصاف بیرسٹر عقیل ملک نے کہا سیاسی پوائنٹ اسکورنگ کیلئے قومی سلامتی کو نظر انداز کرنا سنگین نتائج کا باعث بن سکتا ہے،وزیر دفاع خواجہ آصف نے کہا بریفنگ میں شرکت کو عمران خان رہائی سے مشروط کرناکوتاہ اندیشی ہے، عظمیٰ بخاری نے کہا بائیکاٹ کرنا ملک دشمنی کا ثبوت ہے۔ تفصیلات کے مطابق وِفاقی وزیر دفاع خواجہ محمد آصف نے کہا ہے کہ قومی اتحاد اور یک جہتی کے اظہار کو عمران خان کی شرکت اور رہائی سے مشروط کرنا پی ٹی آئی کی کوتاہ اندیشی ہے ، یہ حب الوطنی کو مشروط کرنے کے مترادف ہے ۔ ایک بیان میں وزیر دفاع نے کہا کہ وطن اور اسکی سلامتی شخصیات اور لیڈرشپْ سے کہیں زیادہ اہم ہے ۔وزیر دفاع نے کہا کہ پاکستان کو تا قیامت دوام ہے انشاء اللہ ۔ بڑے محترم لیڈ آئے اور دنیا سے رخصت ہوئے اپنی یاد چھوڑ جاتے ہیں قومیں زندہ رہتی ہیں ۔ وزیر مملکت برائے قانون و انصاف بیرسٹر عقیل ملک نے پہلگام حملے کے بعد بھارت کے ساتھ بڑھتی ہوئی کشیدگی کے تناظر میں قومی اتحاد پر زور دیا ہے۔ ایک انٹرویو میں انہوں نے پاکستان تحریک انصاف پر تنقید کی کہ وہ حالیہ قومی سلامتی بریفنگ میں شرکت سے انکار کرکے معاملے کو سیاسی رنگ دے رہی ہے۔ انہوں نے کہا کہ پارٹی نے تاریخی طور پر خود کو اہم معاملات پر قومی اتفاق رائے سے دور رکھا ہے۔انہوں نے موجودہ قومی سلامتی کی صورتحال پر تبادلہ خیال کرنے کے لیے تمام سیاسی جماعتوں کے لیے ایک جامع بریفنگ کا اہتمام کرکے اتحاد کی حکومت کی کوششوں کو اجاگر کیا۔ دریں اثناء وزیر اطلاعات پنجاب عظمیٰ بخاری نے کہا ہےکہ ملک دشمن ٹولےسے اسکے علاوہ توقع بھی کیا کی جاسکتی ہے، پی ٹی آئی کے نام نہاد ٹائیگر ابھی بھی ملک اور اداروں کے خلاف جنگ برپا کئے ہوئے ہیں۔ انہوں نے کہا ہے کہ یہی وہ جماعت ہے جو اپنی حکومت میں کسی سیکیورٹی بریفنگ میں شرکت نہیں کرتی تھی اور پھر میڈیا پر آ کر شکوے کرتی تھی کہ کیا کروں، جنگ کرلوں؟”عظمیٰ بخاری نے مزید کہا، “ان سے اور کیا توقع کی جا سکتی ہے؟ ان کے ٹائیگرز آج بھی ریاستی اداروں اور ملک کے خلاف محاذ آرائی میں مصروف ہیں۔وزیر اطلاعات نے زور دیا کہ قومی سلامتی جیسے اہم معاملات پر سیاست سے بالاتر ہو کریکجہتی اور سنجیدگی کی ضرورت ہے۔
