جارحیت کی صورت میں خمیازہ بھگتنا پڑے گا،وفاقی وزیر رانا تنویر حسین کا بھارت کو انتباہ
مریدکے: وفاقی وزیر برائے غذائی تحفظ اور تحقیق رانا تنویر حسین نے کہا ہے کہ افواج پاکستان ہر طرح کی جارحیت سے نمٹنے کے لیے بالکل تیار ہے۔ انہوں نے بھارت کو خبردار کرتے ہوئے کہا کہ اگر اس نے کوئی غلطی کی تو اسے اس کا خمیازہ بھگتنا پڑے گا۔
مریدکے میں میڈیا سے گفتگو کرتے ہوئے رانا تنویر حسین نے کہا کہ ہماری فوج دنیا کی بہترین فوج ہے اور 24 کروڑ عوام افواج پاکستان کے ساتھ ہیں۔ انہوں نے مزید بتایا کہ چین، ترکیہ سمیت دیگر دوست ممالک نے واضح پیغامات دیے ہیں کہ اگر پاکستان کی سالمیت پر کوئی آنچ آئی تو وہ پاکستان کے ساتھ کھڑے ہوں گے۔
وفاقی وزیر نے یہ بھی بتایا کہ افواج پاکستان بلوچستان اور خیبر پختونخوا میں خوارجیوں کے خلاف آپریشن کر رہی ہے۔ انہوں نے پی ٹی آئی پر غیر ملکی ایجنڈے پر کام کرنے کا الزام عائد کرتے ہوئے کہا کہ 9 مئی کو پی ٹی آئی نے دفاعی مقامات پر حملہ کیا اور ملک کو کمزور کرنے کی کوشش کی۔
