کراچی(اسٹاف رپورٹر)کراچی واٹر اینڈ سیوریج کارپوریشن نے جامعہ کراچی میں پانی کی لائن کے متاثر ہونے کے باعث اسپتالوں کو پانی کی فراہمی یقینی بنانے کے لیے ہنگامی آبی منصوبہ ترتیب دے دیا انچارج ہائیڈرنٹس سیل سید سردار شاہ کے مطابق لائنوں کے متاثر ہونے کے باعث اسپتالوں کو واٹر ٹینکرز کے ذریعے پانی فراہم کیا جارہا ہے اس وقت سول اسپتال اور ایس آئی یو ٹی کو یومیہ پچاس پچاس ہزار گیلن پانی ٹینکرز کے ذریعے فراہم کیا جا رہا ہے جبکہ واٹر ٹینکرز کی فراہمی کے اس اہم آپریشن کی نگرانی ہائیڈرنٹس سیل ٹو ایم ڈی فوکل پرسن شہباز بشیر سر انجام دے رہے ہیں دوسری جانب چیف انجینئر ڈبلیو ٹی ایم ظفر پلیجو کے مطابق کارڈیو (NICVD) کو یومیہ چار لاکھ گیلن اور جناح اسپتال کو یومیہ ڈھائی لاکھ گیلن پانی لائنوں کے ذریعے فراہم کیا جا رہا ہے اور آج بھی جناح اسپتال کو دن ایک بجے سے شام چھ بجے تک لائن کے ذریعے پانی فراہم کیا گیا چیف انجینئر نے بتایا کہ ہنگامی صورتحال کو مدنظر رکھتے ہوئے شہریوں کو بلا تعطل پانی کی فراہمی یقینی بنانے کے لیے ہنگامی آبی منصوبہ ترتیب دیا گیا ہے جس کے تحت اسپتالوں سمیت مختلف علاقوں میں ڈبلیو ٹی ایم سے پانی فراہم کیا جا رہا ہے اس منصوبے کے تحت کلفٹن کیماڑی جمشید ٹاؤن لیاری اور صدر کے علاقوں میں پانی فراہم کیا جاتا ہے تاکہ کم سے کم علاقے متاثر ہوں۔
