جیکب آباد میں محنت کشوں کے عالمی دن کے موقع پر ریلیاں، محنت کشوں کو حقوق دینے کے مطالبات۔ تفصیلات کے مطابق جیکب آباد میں یکم مئی محنت کشوں کے عالمی دن کے موقع پر مختلف مزدور تنظیموں کی جانب سے ریلیاں نکالی گئی، رکشہ یونین اور ریڑھی یونین کی جانب سے رحیم بخش بروہی، شاہ نواز منجھو، نظر محمد بروہی، ضمیر احمد لہر کی قیادت میں ریلیاں شہید اللہ بخش پارک سے نکالی گئیں، ریلیوں میں شریک محنت کشوں نے ہاتھوں میں بینر اور پلے کارڈ اٹھائے ہوئے تھے جن پر محنت کشوں کے حق میں نعرے درج تھے، ریلیوں کے شرکاء پریس کلب کے سامنے پہنچے جہاں خطاب کرتے ہوئے مقررین نے کہا کہ یکم مئی کو شکاگو کے شہدا نے اپنی جانوں کے نذرانے پیش کئے جس پر انہیں سلام پیش کرتے ہیں، انہوں نے کہا کہ ملک کی معیشت کا پہیہ مزدور کی بدولت چلتا ہے لیکن مزدور دو وقت کی روٹی کے لیے بھی ترس رہا ہے، انہوں نے کہا کہ آئین پاکستان میں مزدوروں کے حقوق درج ہیں لیکن ان پر عملدرآمد نہیں ہورہا اور محنت کشوں کا استحصال کیا جارہا ہے، انہوں نے مطالبہ کیا کہ محنت کشوں کو ان کے بنیادی حقوق فراہم کئے جائیں۔
جیکب آباد رپورٹ ایم ڈی عمرانی
جیکب آباد میں مسلح افراد کا گاؤں پر حملہ، 2 کمسن سگے بھائی قتل، ماں اور باپ سمیت 3افراد زخمی۔ تفصیلات کے مطابق جیکب آباد کی تحصیل گڑہی خیرو کے پنہوں بھٹی تھانہ کی حدود گاؤں غلام رسول لاشاری پر نامعلوم مسلح افراد نے جدید اسلحہ سے حملہ کرکے شدید فائرنگ کردی جس کے نتیجے میں دو کمسن سگے بھائی قتل جبکہ ماں، باپ اور ایک بھائی شدید زخمی ہوگئے، قتل ہونے والے کمسن سگے بھائیوں میں پسند گورگیج اور فہیم گورگیج شامل ہیں، حملہ آور فائرنگ کرتے ہوئے باآسانی فرار ہوگئے، اطلاع پر پولیس نے پہنچ کر زخمیوں کو اسپتال منتقل کیا جبکہ قتل ہونے والے کمسن بھائیوں کی لاشیں ضروری کاروائی کے بعد ورثہ کے حوالے کی گئی، حدود کی پولیس کے مطابق واقعہ جتوئی اور گورگیج برادری کے درمیان دیرینہ تنازعہ کی بنا پر پیش آیا ہے، ملزمان کی گرفتاری کے لیے علاقہ کی ناکابندی کردی ہے تاہم کوئی گرفتاری عمل میں نہ آسکی تھی۔
جیکب آباد پولیس کی کاروائیاں، 2 مطلوب ملزمان سمیت 3 ملزمان گرفتار، چرس برآمد۔ تفصیلات کے مطابق جیکب آباد کی تحصیل ٹھل کے اے سیکشن تھانہ کی پولیس نے مختلف کاروائیوں کے دوران دو مطلوب ملزمان سمیت تین ملزمان کو گرفتار کرلیا ہے، پولیس ترجمان کے مطابق ٹھل کے اے سیکشن تھانہ کی پولیس نے چیکنگ کے دوران ایک ملزم امتیاز دایو سے ایک کلو سے زائد چرس برآمد کرکے گرفتار کرنے کا دعویٰ کیا ہے، علاوہ ازیں مختلف مقدمات میں مطلوب دو ملزمان اللہ رکیو انڑ اور حاجی غازی برڑو کو بھی گرفتار کرلیاگیا ہے، پولیس نے گرفتار ملزمان کے خلاف قانونی کاروائی کردی ہے۔
جیکب آباد، سورج نے تیور بدلنا شروع کردئیے، درجہ حرارت 47 سینٹی گریڈ سے تجاوز کرگیا، ہیٹ ویو کے باعث متعدد افراد بے ہوش، بجلی کی بدترین لوڈشیڈنگ اور ٹرپنگ نے عوام کی زندگی اجیرن بنادی۔ تفصیلات کے مطابق جیکب آباد میں آئے روز گرمی کی شدت میں اضافہ ہوتا جارہا ہے، جمعرات کے روز جیکب آباد اور گردونواح کے علاقوں میں گرمی کا درجہ حرارت 47 سینٹی گریڈ تک ریکارڈ کیا گیا، شدید گرمی کی وجہ سے شہری گھروں میں محصور ہوگئے ہیں جبکہ گرمی کی وجہ سے متعدد شہریوں کے بے ہوش کی اطلاعات موصول ہوئی ہیں، جیکب آباد میں ایک طرف قیامت خیز گرمی تو دوسری جانب سیپکو حکام کی جانب سے بدترین لوڈشیڈنگ اور ٹرپنگ نے عوام کی زندگی اجیرن بنادی ہے شہری علاقوں میں 12 سے 16 گھنٹے جبکہ دیہی علاقوں میں کئی کئی روز تک بجلی بند کردی جاتی ہے جس کی وجہ سے عوام شدید اذیت کا شکار ہے، گرمی کی شدت میں اضافے اور بجلی کی لوڈشیڈنگ کی وجہ سے شہر میں پینے کی پانی اور برف کی قلت پیدا ہوگئی ہے، شہریوں نے مطالبہ کیا ہے کہ بجلی کی لوڈشیڈنگ اور ٹرپنگ کا سلسلہ بند کرکے عوام کو رلیف فراہم کیا جائے، ڈاکٹروں نے عوام کو خبردار کرتے ہوئے ہدایت کی ہے کہ بلاوجہ گھروں سے باہر نہ نکلیں، پانی کا زیادہ سے زیادہ استعمال کریں اور باہر نکلتے وقت سر کو ڈھانپ کر رکھیں۔
