بجلی کے بڑے بریک ڈاؤن کے بعد بحالی کا سلسلہ جاری- 85 پاور سب اسٹیشن بحال-50 فیصد بجلی بحال- بجلی کا بریک ڈاؤن ہوا ہے خرابی کا تعین ابھی تک نہیں ہوسکا
اسپین اور پرتگال میں بجلی کے بڑے بریک ڈاؤن کے بعد بحالی کا سلسلہ جاری ہے۔
پرتگال میں 89 میں سے85 پاور سب اسٹیشن بحال کیے گئے ہیں، اسپین کے وزیراعظم نے کہا ہے کہ اسپین کے گرڈ آپریٹرز نے ملک میں 50 فیصد بجلی بحال کردی ہے۔
زرائع کا بتانا ہے کہ مشترکہ نیٹ ورک میں خرابی سے پرتگال اور اسپین میں بجلی کا بریک ڈاؤن ہوا ہے خرابی کا تعین ابھی تک نہیں ہوسکا۔
دوسری جانب فرانس کے جنوبی علاقوں میں بھی بجلی معطل ہوئی۔
اسپین اور پرتگال میں بجلی بندش سے پروازوں کا شیڈول بھی متاثر ہوا جبکہ میٹرو ٹرینوں کا آپریشن معطل رہا۔
======================
بجلی 3 پیسے سستی ہونے کاامکان
نیپرا کو ماہانہ ایڈجسٹمنٹ اور سہ ماہی ایڈجسٹمنٹ کی مد میں بجلی سستی کرنے کی درخواست دے دی گئی
لاہور – بجلی 3 پیسے سستی ہونے کاامکان، نیپرا کو ماہانہ ایڈجسٹمنٹ اور سہ ماہی ایڈجسٹمنٹ کی مد میں بجلی سستی کرنے کی درخواست دے دی گئی۔ تفصیلات کے مطابق ماہانہ اور سہ ماہی ایڈجسٹمنٹ کی مد میں بجلی مزید سستی کیے جانے کی توقع ہے۔ مارچ کی ماہانہ ایڈجسٹمنٹ کے تحت فی یونٹ بجلی 3 پیسے سستی ہونے کاامکان ہے، سہ ماہی ایڈجسٹمنٹ کی مد میں بجلی 1 روپے فی یونٹ سے زائد سستی ہونے کا امکان ہے، سہ ماہی ایڈجسٹمنٹ کے تحت مجموعی طور پر 51 ارب 49 کروڑ کا ریلیف ملے گا۔
مالی سال 2024-25 کی تیسری سہ ماہی ایڈجسٹمنٹ کی مد میں درخواست دائر کردی گئی، کیپسٹی چارجز کی مد میں 47 ارب 12 کروڑ 40 لاکھ روپے کمی کی درخواست کی گئی ہے۔ سہ ماہی ایڈجسٹمنٹ اور ایف سی اے کی درخواست پر نیپرا کل سماعت کرے گا، درخواست میں کہا گیا کہ مارچ میں 8 ارب 40 کروڑ 90 لاکھ یونٹس بجلی پیدا کی گئی، ماہ مارچ میں بجلی کی لاگت 9.22 روپے فی یونٹ تھی۔
درخواست کے مطابق مارچ کے لئے بجلی کی ریفرنس لاگت9.25 روپے فی یونٹ تھی۔ دوسری جانب وزیراعظم شہباز شریف کے اعلان کو ساڑھے 3 ہفتے گزر گئے، تاہم ملک میں بجلی تاحال 7.41 روپے فی یونٹ سستی نہ ہونے کا انکشاف ہوا ہے۔ ڈان نیوز کے مطابق وزیراعظم کے اعلان کے ساڑھے تین ہفتے بعد بھی ملک میں بجلی 7 روپے 41 پیسے فی یونٹ سستی نہ ہوسکی، وزیراعظم کے اعلان کے بعد اب تک مجموعی طور پر بجلی صرف 4 روپے 97 پیسے فی یونٹ ہی سستی کی گئی ہے۔
بتایا گیا ہے کہ بجلی کی قیمت میں اب تک کی کمی ماہانہ، سہ ماہی ایڈجسٹمنٹس اور پیٹرولیم لیوی کی مد میں کی گئی ہے، ماہانہ ایڈجسٹمنٹ میں بجلی کی قیمت میں 1 روپے 36 پیسے فی یونٹ کمی کی گئی جب کہ مالی سال کی دوسری سہ ماہی ایڈجسٹمنٹ میں بجلی 1 روپے 90 پیسے فی یونٹ سستی کی گئی، اسی طرح پیٹرولیم لیوی کی مد میں بجلی کی قیمت 1 روپے 71 روپے فی یونٹ کم کی گئی۔
معلوم ہوا ہے کہ بجلی کی تقسیم کار کمپنیوں (ڈسکوز) کی جانب سے مالی سال کی تیسری سہ ماہی ایڈجسٹمنٹ کی درخواست نیپرا میں جمع کرائی جا چکی ہے، ڈسکوز کی درخواست پر نیپرا 29 اپریل کو سماعت کرے گا، ڈسکوز نے سہ ماہی ایڈجسٹمنٹ میں 51 ارب 93 کروڑ 30 لاکھ روپے کمی کی درخواست کی ہے، تیسری سہ ماہی ایڈجسٹمنٹ میں بجلی کتنی سستی ہوگی یا نہیں اس حوالے سے فیصلہ نیپرا کرے گا۔
======================
آئندہ پندرہ روز کیلئے پیٹرولیم مصنوعات کی قیمتیں برقرار رہنے کا امکان
آئندہ پندرہ روز کیلئے پیٹرولیم مصنوعات کی قیمتیں برقرار رہنے کا امکان
اسلام آباد (خالد مصطفیٰ) آئندہ پندرہ روز کیلئے پیٹرولیم مصنوعات کی قیمتیں برقرار رہنے کا امکان ہے۔
تفصیلات کے مطابق یکم مئی 2025 سے آئندہ پندرہ روز کے لیے پیٹرولیم مصنوعات کی قیمتوں میں تبدیلی کا امکان نہیں ہے، کیونکہ صنعتی اور سرکاری تخمینوں کے مطابق پیٹرول کی قیمت میں فی لیٹر صرف 0.016 روپے کمی اور ہائی اسپیڈ ڈیزل کی قیمت میں فی لیٹر محض 0.01 روپے اضافہ متوقع ہے۔
سرکاری ذرائع نے اس نمائندے کو بتایا کہ پیٹرول اور ڈیزل کی قیمتوں میں معمولی اتار چڑھاؤ کا بوجھ ممکنہ طور پر صارفین پر نہیں ڈالا جائے گا۔
