جیکب آباد: رپورٹ ایم ڈی عمرانی
جمعیت علمائے اسلام سندھ کے سیکریٹری جنرل علامہ راشد محمود سومرو نے صوبے میں بڑھتی ہوئی بدامنی اور دریائے سندھ پر نئے کینالوں کی تعمیر کے خلاف 25 فروری کو صوبے بھر کے ضلعی ہیڈکوارٹرز میں پریس کلبوں کے سامنے مظاہروں کا اعلان کیا ہے۔ جے یو آئی سندھ کے انفارمیشن سیکریٹری ڈاکٹر اے جی انصاری کے جاری نے کارکنان اور عوام سے ان مظاہروں میں بھرپور شرکت کی اپیل کی ہے۔ علامہ راشد محمود سومرو نے کہا ہے کہ مظاہروں کا مقصد صوبے میں امن و امان کی بگڑتی صورتحال اور دریائے سندھ پر مجوزہ نہری منصوبوں کے خلاف آواز اٹھانا ہے انہوں نے کہا کہ ان کینالوں کی تعمیر سے سندھ کے پانی کے وسائل پر منفی اثرات مرتب ہونگے جو صوبے کی زراعت اور معیشت کے لیے تباہ کن ثابت ہونگے جے یو آئی ضلع جیکب آباد کے پریس سیکریٹری اسداللہ حیدری نے کہا ہے کہ 25 فروری کو جامعہ قاسم العلوم جیکب آباد میں ضلعی مجلس عمومی کا اہم اجلاس ہوگا اجلاس کے بعد کینالوں اور بدامنی کے خلاف بڑا جلوس نکالا جائیگا۔ جے یو آئی کی قیادت نے تمام کارکنان اور عوام سے اپیل کی ہے کہ وہ ان مظاہروں میں بھرپور شرکت کریں تاکہ صوبے کے حقوق کا تحفظ یقینی بنایا جا سکے اور صوبے میں امن و امان کی بحالی کے لیے موثر اقدامات کیے جا سکیں۔
جیکب آباد ملی یکجہتی کونسل سندھ کے سیکرٹری اطلاعات مجاہدچنا نے کہا ہے کہ امریکی ڈالروں کے بدلے قوم کی بیٹی ڈاکٹر عافیہ کو بیچنے والے ملک و قوم کے وفادار ومحافظ نہیں بلکہ غدارہیں ان سے کسی خیر کی امید نہیں ہے ڈاکٹرعافیہ کے ساتھ ظلم، ملک وقوم کو غیروں کی غلامی میں دینے والے خودنشان عبرت بن چکے اورکچھ اپنی باری کے منتظر ہیں کیوں کہ اللہ کے پاس دیر ضرور ہے مگراندھیر نہیں ہے۔ جیکب آباد میں میڈیاکے نمائندوں سے بات چیت کرتے ہوئے ان کا مزید کہنا تھاکہ آئین وقانون اورجمہوریت کی بات کرنے والے خودمسلسل اس سے انحراف کر ہے ہیں۔ فارم 47کی مسلط کردہ حکومت سے لیکر صحافت کا گلاگھونٹنے کا پیکا ایکٹ 2025 اس کی واضح مثال ہے۔ قوم کی بیٹی ڈاکٹر عافیہ کے امریکی قید ناحق و تنہائی میں 8 ہزار دن گزرگئے مگرحکومت خاموش تماشائی بنی ہوئی ہے۔ عافیہ کی طویل قید ناحق ظاہر کرتی ہے کہ ریاست کے ذمے داروں کی نظروں میں ایک عام پاکستانی شہری کی کیا قدر و منزلت ہے؟ حکمرانوں نے بھی عافیہ کی رہائی کے حوالے سے قوم سے کئے گئے وعدوں پر کوئی سنجیدگی نہیں دکھائی۔ جب تین شہریوں کے قاتل ریمنڈ ڈیوس کو امریکی حکومت کے دباؤ پر رہائی مل سکتی ہے تو پھر بے گناہ قید ڈاکٹر عافیہ کورہائی کیوں نہیں دلائی جا سکتی ہے۔
جیکب آباد شہید سید حسن نصراللہ اور شہید سید ہاشم صفی الدین کی تشییع جنازہ کے موقع پر ڈی سی چوک جیکب آباد میں شہداء سے تجدید عہد کے عنوان سے علامہ مقصود علی ڈومکی کی زیر صدارت ایک پروقار تقریب منعقد ہوئی۔ تقریب میں شہداء کی یاد میں شمع روشن کر کے شہداء کی تصاویر پر پھول نچھاور کئے گئے۔ تقریب سے پ ٹ الف سندھ کے سابق صدر انتظار حسین چھلگری، شہری اتحاد جیکب آباد کے رہنما اور مہران سوشل فورم کے چیئرمین ایڈوکیٹ عبدالحئی سومرو، جماعت اسلامی کے ضلعی امیر محمد ابوبکر سومرو، پیپلز پارٹی شہید بھٹو کے ضلعی صدر منجھو، انجمن سپاہ علی اکبر جیکب آباد کے چیئرمین سید احسان علی شاہ بخاری، مجلس وحدت مسلمین عزاداری ونگ کے صوبائی نائب صدر سید غلام شبیر نقوی، آئی ایس او کہ صدر اظہار الحسن،ڈومکی اتحاد کے جنرل سیکرٹری استاد عبدالفتاح ڈومکی، احمد علی ٹالانی، میرالی اتحاد کے صدر علی بخش میرالی، نثار احمد ابڑو اور ایم ڈبلیو ایم عزاداری ونگ کے ضلعی صدر نور الدین گولاٹو و دیگر نے خطاب کیا۔ اس موقع پر تقریب سے خطاب کرتے ہوئے مجلس وحدت مسلمین پاکستان کے مرکزی رہنما علامہ مقصود علی ڈومکی نے کہا کہ سید مقاومت کی شہادت پر پورا عالم اسلام سوگوار ہے پاکستان کے شیعہ سنی عوام متحد ہو کر قبلہ اول کی آزادی کی تحریک میں حماس اور حزب اللہ کے ساتھ کھڑے ہیں آج سید مقاومت کی تدفین کے موقع پر دنیا بھر کے شیعہ اور سنی مسلمان امریکہ اور اسرائیل کے خلاف اپنے غم اور غصے کا اظہار کر کے شہدائے مقاومت کو سلام عقیدت پیش کر رہے ہیں۔ انہوں نے کہا کہ بانی پاکستان قائد اعظم محمد علی جناح ؒ اور حکیم الامت مصور پاکستان علامہ ڈاکٹر محمد اقبال ؒ نے اس وقت اسرائیل غاصب کی مخالفت کی جب برطانیہ اور عالمی سامراجی قوتیں غاصب ریاست کے ناجائز وجود کا اعلان کر رہی تھیں۔ لہذا پاکستان کے غیرت مند عوام اور سیاسی مذہبی و قوم پرست جماعتوں نے ہمیشہ تحریک آزادی فلسطین کی غیر مشروط حمایت کی ہے ہم کسی بھی غدار کو یہ اجازت ہرگز نہیں دیں گے کہ وہ غاصب اسرائیل کو تسلیم کرے اور قبلہ اول اور فلسطین کے ساتھ خیانت کرے۔
جیکب آباد میں بڑھتی ہوئی بدامنی، قبائلی جھگڑوں اور دریائے سندھ سے کینال نکالنے کے خلاف علی محمد عوامی پارٹی کی جانب سے احتجاجی مظاہرہ اور بھوک ہڑتال۔ تفصیلات کے مطابق جیکب آباد میں علی محمد عوامی پارٹی کی جانب سے جیکب آباد میں بڑھتی ہوئی بدامنی، قبائلی جھگڑوں اور دریائے سندھ سے کینال نکالنے کے خلاف ایک احتجاجی جلوس چیئرمین دلمراد لاشاری کی قیادت میں نکالا گیا، جلوس کے شرکاء نے شہر کے مختلف راستوں پر مارچ کرنے کے بعد پریس کلب کے سامنے دھرنا دیا، اس موقع پر مظاہرین نے علامتی بھوک ہڑتال کی اور نعریبازی کی، اس موقع پر رہنماؤں نے خطاب کرتے ہوئے کہا کہ جیکب آباد میں بدامنی نے عوام کا جینا محال کردیا ہے جبکہ قبائلی جھگڑوں کی وجہ سے کئی انسانی جانیں ضائع ہورہی ہیں، انہوں نے کہا کہ حکومت بڑھتی ہوئی بدامنی کو قابو کرنے سمیت قبائلی جھگڑوں کی روکتھام کے لیے عملی اقدامات اٹھائے، انہوں نے کہا کہ دریائے سندھ سے کینال نکالنے کے خلاف بھرپور مزاحمت کریں گے، حکمران سندھ کا پانی چوری کرنے کی سازش بند کرکے سندھ کے عوام میں پھیلی بے چینی کو دور کیا جائے۔
