کراچی ( اسٹاف رپورٹر)چیئرمین آل پاکستان پیٹرولیم ڈیلرز ایسوسی ایشن عبدالسمیع خان نے کہا ہے کہ پیٹرولیم مصنوعات کی قیمتوں پر ڈی ریگولیٹ فارمولے کو مسترد کرتے ہیں، ڈی ریگولیٹ فارمولا عائد ہونے سے پیٹرولیم اسمگلنگ اور ملاوٹ کا سلسلہ شروع ہو جائے گا،ایک بیان میں انھوں نے کہا کہ پیٹرولیم مصنوعات کی قیمتوں کو ڈی ریگولیٹ ہونے سے پیٹرول پمپ اپنی قیمت کا تعین خود کرے گا، وزارت پیٹرولیم کو ہنگامی خط میں ڈی ریگولیٹ فارمولے کی مخالفت اور مارجن بڑھانے کا مطالبہ کیا جائے گا، ہمارا مطالبہ ہے کہ پیڑولیم ڈیلرز کا فی لیٹر مارجن 4 فیصد اضافے سے 13 روپے کیا جائے ۔
==================
سندھ حکومت 5 لاکھ سولر سسٹم دینے کی اسکیم رواں سال شروع کریگی، ناصر شاہ
کراچی (اسٹاف رپورٹر) صوبائی وزیر توانائی، ترقیات و منصوبہ بندی سید ناصر حسین شاہ نے کہا ہے کہ سندھ حکومت 5 لاکھ سولر سسٹم دینے کی اسکیم رواں سال شروع کرنے جا رہی ہے ، جہاں بجلی نہیں پہنچی وہاں سولر فراہم کئے جائیں گے، یہ بات انھوں نے عبداللہ رند گوٹھ منگھوپیر ٹاؤن میں بجلی فراہمی کی افتتاحی تقریب سے خطاب کرتے ہوئے بتائی ، انہوں نے کہا کہ عبداللہ رند گوٹھ میں 450 سے زائد گھر ہیں جنہیں پہلی مرتبہ کے الیکٹرک کے ذریعے بجلی فراہم کی جارہی ہے ، انھوں نے کہا کہ جہاں بجلی نہیں پہنچی وہاں سولر فراہم کئے جائیں گے، سستی بجلی سے کراچی کے شہریوں کو فائدہ ہوگا جو گاؤں ریگولائز ہونے ہیں اس پر کام ہورہا ہے، صنعتیں بھی بہت ضروری ہیں لیکن لوگوں کو بجلی فراہم کرنا اولین ترجیح ہے،آخر میں انھوں نے درگاہ پر چادر چڑھائی اور ملک میں امن کےقائم کی دعا کی۔
