کراچی: محمود آباد کے علاقے کشمیر کالونی میں گھر سے نئی نویلی دلہن کی لاش ملنے کے واقعے میں پولیس نے متوفیہ کی موت کی ممکنہ وجہ بتا دی۔
پولیس حکام نے بتایا کہ متوفیہ کی 3 روز قبل شادی ہوئی تھی لیکن جسم پر تشدد کا کوئی نشان نہیں ہے، لواحقین کا بیان ہے کہ متوفیہ کو سانس کا عارضہ تھا۔
دلہن کے لواحقین نے پولیس حکام کو بتایا کہ متوفیہ کو اکثر دورے پڑنے کی شکایت بھی رہتی تھی۔
شوہر نے بتایا کہ متوفیہ کو گزشتہ شب بھی سانس لینے میں دشواری کا سامنا تھا، صبح اٹھ کر دیکھا تو اہلیہ کا جسم اکڑ چکا تھا۔
پولیس حکام کے مطابق شبہ ہے کہ رات کے کسی پہر موت واقع ہوئی، متوفیہ اور شوہر کی دوسری شادی تھی، لیڈی ایم ایل او کے آنے پر پوسٹ مارٹم ہوگا۔
گزشتہ سال مئی میں لاہور میں گھر سے نئی نویلی دلہن کی لاش برآمد ہوئی تھی جبکہ پولیس نے خاوند سلیمان کو حراست میں لیا تھا۔
پولیس نے واقعے کے حوالے سے بتایا تھا کہ خاتون کی 10 روز قبل سے شادی ہوئی تھی، سلیمان پہلے سے شادی شدہ تھا لیکن خاتون کو نہیں بتایا تھا، خاتون نے اہلخانہ کو فون پر بتایا کہ سلیمان نے تشدد کا نشانہ بنایا۔
حکام نے مزید کہا تھا کہ صبح خاتون کی اس کے فلیٹ سے لاش ملی تاہم خاتون کے خاوند سلیمان کو حراست میں لے لیا۔
==========================
طلبہ کو مفت لیپ ٹاپ دینے کا اعلان
پشاور: وزیراعلیٰ علی امین گنڈاپور نے خیبرپختونخوا کے طلبہ کو مفت لیپ ٹاپ دینے کا اعلان کیا ہے۔
تفصیلات کے مطابق وزیراعلیٰ خیبرپختونخوا علی امین گنڈاپور نے ایک بیان میں کہا ہے کہ پنجاب کے جتنے فیصد طلبہ کو لیپ ٹاپ دیے جارہے ہیں ہم بھی اتنے فیصد طلبہ کو مفت لیپ ٹاپ دینگے۔
علی امین گنڈا پور نے کہا کہ وزیر اعلیٰ پنجاب، خیبرپختونخوا حکومت کے طرز پر اپنے شہریوں کو مفت صحت کارڈ دے، ہم نے اپنی پوری آبادی کو صحت کارڈ پلس دیا اور اب لائف انشورنس کی سہولت دے رہے ہیں، پنجاب حکومت بھی اپنی پوری آبادی کو یہ سہولیات دے۔
وزیراعلیٰ خیبرپختونخوا کا کہنا تھا کہ مشکل حالات کے باوجود آمدن میں 55 فیصد اضافہ کیا گیا، پنجاب بھی اپنی آمدن 12 فیصد سے 55 فیصد تک بڑھائے، خیبر پختونخوا حکومت کے پاس خزانے میں 176 ارب روپے کا سرپلس پڑا ہے۔
انہوں نے کہا کہ خیبر پختونخوا واحد صوبہ ہے جس نے آئی ایم ایف کا ٹارگٹ حاصل کیا، باقی کسی دوسرے صوبے نے آئی ایم ایف کا ٹارگٹ حاصل نہیں کیا۔
وزیراعلیٰ خیبرپختونخوا نے کہا کہ پنجاب کو آئی ایم ایف کی طرف سے 300 ارب روپے سرپلس کا ہدف دیا گیا تھا، پنجاب حکومت نے 146 ارب روپے کا خسارہ کیا۔
علی امین گنڈا پور نے مزید کہا کہ 4 ہزار مستحق بچیوں کی شادیاں کرارہے ہیں اور ہر بچی کو 2 لاکھ روپے دے رہے ہیں، میں چیلنج کرتا ہوں پنجاب کی کارکردگی ہماری ایک فیصد کارکردگی کے برابر بھی نہیں، میں مناظرے کے لئے تیار ہوں۔
