لاہور( ) تحریک لبیک یارسول اللہ صلی اللہ علیک وسلم و تحریک صراط مستقیم کے زیر اہتمام ایوانِ اقبال لاہور میں تاریخی ”النبی الامی ﷺ کانفرنس“ کا انعقاد کیا گیا۔ اس موقع پر مرکز صراط مستقیم سے فارغ التحصیل ہونے والے 142 علماء کرام کی دستارِ فضیلت بھی کی گئی۔ کانفرنس کی صدارت پیر سید حیدر مرتضیٰ شاہ صاحب نے کی جبکہ صاحبزادہ ڈاکٹر میاں محمد صغیر احمد نقشبندی اور مفتی محمد تنویر احمد کوٹلوی مہمان خصوصی تھے۔ تحریک لبیک یارسول اللہ صلی اللہ علیک وسلم کے سربراہ اور تحریک صراط مستقیم کے بانی ڈاکٹر محمد اشرف آصف جلالی نے رسولِ اکرم ﷺ کی شانِ امیت کو اجاگر کرتے ہوئے تاریخی مقالہ پیش کرتے ہوئے کہا: حضرت محمد مصطفی ﷺ کا اُمی ہونا تمام انبیاء کرام علیہم السلام میں سے آپ کا انفرادی معجزہ ہے۔ آپ ﷺ نے اہل کتاب کے پادریوں کو پہلی آسمانی کتابوں کی وہ معلومات ارشاد فرمائیں کہ وہ دنگ رہ گئے۔ ہمارے لحاظ سے اُمی ہونا نقص اور عیب ہے جبکہ رسول اللہ ﷺ کے لحاظ سے بہت بڑا شرف و کمال ہے۔ رسول اکرم ﷺ کے لحاظ سے اُمی کا معنی معاذ اللہ ان پڑھ نہیں بلکہ بے پڑھا ہے یعنی لکھے اور لکھا ہوا پڑھے بغیر سب کچھ جاننا ہے۔ اُمی ہونا رسول اکرم ﷺ کا عظیم معجزہ ہے۔ علوم و معارف کے حصول کے لیے کتابت اور قرأت کا سہارا لینا یہ ان لوگوں کے لیے ہے، جو اس کے محتاج ہوں۔ جیسے آنکھوں والا عصا اور کسی ہاتھ پکڑنے والے کا محتاج نہیں ہوتا۔ بلا شبہ نبی اکرم ﷺ کو اللہ تعالیٰ نے ایسے طرق سے علوم عطا کیے کہ آپ ﷺ لکھنے پڑھنے کے ذریعہ سے علوم حاصل کرنے کے محتاج ہی نہیں تھے۔ کانفرنس سے علامہ عبد الرشید اویسی صاحب، مفتی محمد بشیر القادری، صاحبزادہ پیر محمد امین اللہ نبیل سیالوی، علامہ فرمان علی حیدری جلالی، مفتی محمد زاہد نعمانی جلالی نے بھی خطاب کیا۔ کانفرنس میں پیر سید عامر سلطان شاہ، علامہ محمد شاداب رضا نقشبندی، پیر محمد افضل باجوہ، مفتی محمد اکرام الحق نقشبندی، علامہ محمد عرفان الحق جلالی، علامہ محمد طلحہ احسن جلالی، علامہ محمد طلحہ احسن جلالی، علامہ محمد شاہد عمران جلالی، صاحبزادہ محمد مرتضیٰ علی ہاشمی، علامہ محمد صدیق مصحفی، علامہ محمد عدیل مجید جلالی، علامہ محمد فیاض فرقانی، مفتی محمد حناد رضا حبیبی، علامہ محمد فیاض وٹو جلالی سمیت ہزاروں کی تعداد میں علما و عوام اہل سنت نے شرکت کی۔
جاری کردہ۔۔۔
