صوبائی وزیر صحت خواجہ سلمان رفیق نے مقامی ہوٹل میں بنگلہ دیش کالج آف فزیشنز اینڈ سرجنز کے وفد کے اعزاز میں ظہرانے میں شرکت کی۔ ظہرانے سے قبل بنگلہ دیش کالج آف فزیشنز اینڈ سرجنز کے وفد نے پاکستان کالج آف فزیشنز اینڈ سرجنز لاہور سنٹر کا دورہ کرکے جاری تعلیمی سرگرمیوں کا جائزہ لیا اور سراہا۔ اس موقع پر سینیئر نائب صدر کالج آف فزیشنز اینڈ سرجنز پاکستان و وائس چانسلر فاطمہ جناح میڈیکل یونیورسٹی پروفیسر خالد مسعود گوندل، وائس چانسلر کنگ ایڈورڈ میڈیکل یونیورسٹی پروفیسر محمود ایاز، پروفیسر راشد لطیف خان، پروفیسر ابرار اشرف، پروفیسر غیاث الدین نبی طیب، پروفیسر عامر زمان خان اور پروفیسر عائشہ شوکت موجود تھیں۔ ظہرانے کا اہتمام سینیئر نائب صدر کالج آف فزیشنز اینڈ سرجنز پاکستان و وائس چانسلر فاطمہ جناح میڈیکل یونیورسٹی پروفیسر خالد مسعود گوندل کی جانب سے کیا گیا تھا۔ بنگلہ دیش کالج آف فزیشنز اینڈ سرجنز کے وفد میں صدر پروفیسر محمد شاہد اللہ، نائب صدر پروفیسر کوہ نور بیگم، سیکرٹری پروفیسر میجر جنرل ریٹائرڈ علی میاں و کونسل ممبران پروفیسر تہمینہ بیگم اور محمد کمال حسین نے شرکت کی۔ صوبائی وزیر صحت خواجہ سلمان رفیق اور وفد کے مابین پاکستان اور بنگلہ دیش کے شعبہ صحت کے اقدامات، بہتری کیلئے جدید اصلاحات و باہمی دلچسپی کے امور پر تبادلہ خیال ہوا۔ خواجہ سلمان رفیق اور بنگلہ دیش کالج آف فزیشنز اینڈ سرجنز کے وفد کے درمیان تحائف کا بھی تبادلہ ہوا۔ صوبائی وزیر صحت خواجہ سلمان رفیق نے اس موقع پر کہا کہ بنگلہ دیش کالج آف فزیشنز اینڈ سرجنز کے وفد کو پاکستان میں خوش آمدید کہتے ہیں۔ پاکستان اور بنگلہ دیش کے درمیان بہت درینہ اور قریبی
سفارتی تعلقات وابستہ ہیں۔ پنجاب کی تاریخ کی پہلی خاتون وزیر اعلیٰ مریم نواز شریف کے ویژن کے مطابق عوام تک صحت کی بہتر سہولیات کی فراہمی کیلئے کوشاں ہیں۔ پاکستان کی تاریخ کا سب سے پہلا سرکاری اور 915 بستروں پر مشتمل سب سے بڑا نواز شریف انسٹی ٹیوٹ آف کینسر ٹریٹمنٹ اینڈ ریسرچ لاہور میں بنایا جا رہا ہے۔ پنجاب میں میڈیکل ایجوکیشن کو پروموٹ کر رہے ہیں۔ لاہور اور سرگودھا میں اسٹیٹ آف دی آرٹ نواز شریف انسٹی ٹیوٹس آف کارڈیالوجی بنائے جا رہے ہیں۔ ہمارے پاس اختیارات اللہ کی امانت ہیں اور ہم ان اختیارات کو صرف اور صرف عوام کی بہتری کیلئے ہی استعمال کر رہے ہیں۔ پنجاب کی عوام کو ریلیف دینے کیلئے چیف منسٹرز چلڈرن ہارٹ سرجری پروگرام، چیف منسٹرز سپیشل انشی ایٹو فار ٹرانسپلانٹ اور چیف منسٹرز ڈائیلسز پروگرام جیسے تاریخی اقدامات اٹھائے گئے ہیں۔ سینئر نائب صدر کالج آف فزیشنز اینڈ سرجنز پاکستان و وائس چانسلر فاطمہ جناح میڈیکل یونیورسٹی پروفیسر خالد مسعود گوندل نے اس موقع پر کہا کہ بنگلہ دیش کالج آف فزیشنز اینڈ سرجنز کے وفد کے اعزاز میں ظہرانے میں خصوصی شرکت پر صوبائی وزیر صحت خواجہ سلمان رفیق کا شکریہ ادا کرتے ہیں۔ بنگلہ دیش کالج آف فزیشنز اینڈ سرجنز کے نو منتخب عہدیداران کو مبارکباد پیش کرتے ہیں۔
