جامعہ کراچی: سنڈیکیٹ کا اجلاس
جامعہ کراچی کے سابق وائس چانسلر پروفیسرڈاکٹر پیرزادہ قاسم رضاصدیقی اور پروفیسرڈاکٹر محمد قیصر کو پروفیسرایمریطس کے عہدے پر فائز کرنے کی منظوری
جامعہ کراچی کے وائس چانسلر پروفیسر ڈاکٹر خالد محمود عراقی کی زیر صدارت سنڈیکیٹ کااجلاس منگل کے روز وائس چانسلر سیکریٹریٹ جامعہ کراچی میں منعقد ہوا۔اجلاس میں جامعہ کراچی کے سابق وائس چانسلر پروفیسرڈاکٹر پیرزادہ قاسم رضاصدیقی اور سابق وائس چانسلر پروفیسرڈاکٹر محمد قیصرکو ان کی طویل تدریسی، تحقیقی وانتظامی خدمات کے اعتراف میں پروفیسرایمریطس کے عہدے پر فائزکرنے کی متفقہ منظوری دی گئی۔
اجلاس میں ریفربیک کیسز کے حوالے سے ایک تین رکنی کمیٹی تشکیل دی گئی جس کے کنوینررکن سنڈیکیٹ جامعہ کراچی پروفیسرڈاکٹر محمد قیصرجبکہ دیگر اراکین میں رکن سنڈیکیٹ جامعہ کراچی ورکن قومی اسمبلی شاہدہ رحمانی اور رکن سنڈیکیٹ جامعہ کراچی پروفیسرڈاکٹر نصرت ادریس شامل ہیں۔اجلاس میں یہ بھی فیصلہ کیا گیاکہ ریفربیک کیسز کے حوالے سے ممبرسنڈیکیٹ جامعہ کراچی شعیب احمد صدیقی ٹی اوآر مرتب کریں گے جو تمام اراکین سنڈیکیٹ کو ارسال کئے جائیں گے اور تمام اراکین سنڈیکیٹ کی سفارشات کے ساتھ اس کو سنڈیکیٹ میں پیش کیاجائے گا۔سنڈیکیٹ سے منظوری کے بعد ریفربیک کے تمام کیسز کو کمیٹی کے سامنے پیش اورکمیٹی کی سفارشات کی روشنی میں فیصلہ کیا جائے گا۔
ڈسپلن کمیٹی پر ایک رکن کی بحیثیت نمائندہ سنڈیکیٹ دوسال کی مدت کے لئے شعبہ حیوانیات کی پروفیسرڈاکٹر صالحہ رحمن کی نامزدگی کی منظوری دی گئی۔ اجلاس میں شعبہ ٹیچرایجوکیشن کی لیکچررقرۃ العین رؤف کو انکوائری رپورٹ کی روشنی میں ریمول فرام سروس(Removal From Service)کی منظوری دی گئی۔
اجلا س نے شعبہ سیاسیات میں پروفیسرڈاکٹرمحمد علی،شعبہ فلسفہ میں پروفیسرڈاکٹر عبدالوہاب سوری اورشعبہ حیوانیات میں پروفیسرڈاکٹر محمد شعیب کی بطور صدر تین سال کی مدت کے لئے تقرری کی منظوری دی گئی۔
دریں اثناء اجلاس میں سنڈیکیٹ کے اجلاس 31 اکتوبر2024 ء کی توثیق کی گئی اور سنڈیکیٹ کے اجلاس منعقدہ 31 اکتوبر 2024 ء کی قراردادوں پر عملدرآمد کی رپورٹ کی منظوری دی گئی۔اجلاس نے سلیکشن بورڈ کے اجلاس منعقدہ 10 دسمبر2024 ء کی رودادکی بھی توثیق کی۔
