کراچی
مور خہ21جنوری 2025
ترجمان حکومت سندھ مصطفی عبداللہ بلوچ کا سول اسپتال کراچی کے ٹراما سینٹر کا دورہ
کراچی21 جنوری ۔ ترجمان حکومت سندھ مصطفی عبداللہ بلوچ نے آج سول اسپتال کراچی کے ٹراما سینٹر کا دورہ کیا۔ انہوں نے مریضوں کو فراہم کی جانے والی سہولیات کا جائزہ لیا اور علاج کے معیار کے بارے میں مریضوں سے دریافت کیا۔ انہوں نے مریضوں کی جانب سے ملنے والے مثبت تاثرات پر اطمینان کا اظہار کیا۔ترجمان حکومت سندھ نے کہا کہ سندھ حکومت نے صحت کے شعبے میں نمایاں اقدامات کیے ہیں۔ سول اسپتال کراچی کا ٹراما سینٹر جدید سہولیات سے لیس ہے جہاں مریضوں کو فوری اور بہترین طبی امداد فراہم کی جا رہی ہے۔ اسپتال میں ایمرجنسی کی سہولیات کے ساتھ جدید طبی آلات بھی موجود ہیں۔ انہوں نے بتایا کہ یہ اسپتال مریضوں کو مفت صحت کی سہولیات فراہم کرتا ہے۔ یہاں پلاسٹک سرجری اور میکسیلو فیشل سرجری مفت کی جاتی ہے۔ ذیابیطس کے مریضوں کے لیے پیریفرل انجیو پلاسٹی کا علاج اور جگر کے کینسر کا بھی علاج کیا جاتا ہے۔ یہ اسپتال نہ صرف سندھ بلکہ پاکستان بھر سے آنے والے مریضوں کو خدمات فراہم کر رہا ہے۔انہوں نے مزید کہا کہ حکومت سندھ نے صحت کے بجٹ میں اضافہ کیا ہے، 
جس کے تحت صوبے بھر میں مختلف صحت کے منصوبے جاری ہیں۔ ان اقدامات سے لاکھوں افراد کو بہتر صحت کی سہولیات میسر آئی ہیں۔مصطفی عبداللہ بلوچ نے کہا کہ نہ صرف سندھ بلکہ دیگر صوبوں سے بھی بڑی تعداد میں مریض علاج کے لیے کراچی کے اسپتالوں کا رخ کرتے ہیں۔ حکومت سندھ صوبے بھر میں ٹراما ہسپتالوں کی توسیع پر بھی کام کر رہی ہے تاکہ عوام کو صحت کی بہترین اور مفت سہولیات فراہم کی جا سکیں۔انہوں نے صحت کے شعبے میں حکومت سندھ کے اقدامات کو سراہا اور کہا کہ حکومت سندھ بلاول بھٹو زرداری کے ویژن کے مطابق عوام کو صحت کی بہترین سہولیات فراہم کرنے کے لیے پرعزم ہے۔ انہوں نے کہا کہ حکومت سندھ عوام کی صحت کو اولین ترجیح دیتی ہے اور اس ضمن میں مزید اقدامات کیے جائیں گے۔
=======================
صوبہ سندھ میں ٹریفک پولیس نے کاروں اور موٹرسائیکلوں کے لیے ڈرائیونگ لائسنس کی فیس میں ترمیم کردی۔ تفصیلات کے مطابق کے مطابق صوبے میں کاروں اور موٹرسائیکلوں دونوں کے لیے مستقل ڈرائیونگ لائسنس جاری کیا جاتا ہے جس کی مدت تین سال اور پانچ سال ہے، تین سالہ لائسنس کی فیس 1 ہزار 410 روپے اور پانچ سالہ لائسنس کی 1 ہزار 860 روپے ہے۔
بتایا گیا ہے کہ موٹروہیکل آرڈیننس کے تحت صوبائی حکومت نے ڈرائیونگ لائسنس کے حصول کی کم از کم عمر 18 سال مقرر کی ہے، درخواست دہندگان کو ڈرائیونگ لائسنس برانچ میں جانے سے پہلے آن لائن پری اپائنٹمنٹ حاصل کرنا ہوگی اور ٹوکن لینے کے بعد انہیں اپنے اصل کمپیوٹرائزڈ قومی شناختی کارڈ کے ساتھ نامزد برانچ میں ذاتی طور پر حاضر ہونا ہوگا، رجسٹریشن کے بعد درخواست دہندگان کو میڈیکل آفیسر کے ذریعہ فٹنس امتحان سے گزرنا پڑتا ہے، مستقل ڈرائیونگ لائسنس حاصل کرنے کے لیے افراد کو پہلے لرنر کا ڈرائیونگ لائسنس حاصل کرنا ہوگا جو ایک سال کے لیے ہوگا۔
معلوم ہوا ہے کہ 2024ء میں کراچی کے رہائشیوں نے مختلف خلاف ورزیوں پر مجموعی طور پر 850 ملین روپے ٹریفک جرمانے ادا کیے، شہر میں سب سے زیادہ ٹریفک قوانین کی عام خلاف ورزیوں میں گاڑیوں کی نمبر پلیٹوں کے مسائل شامل ہیں جس کے نتیجے میں 2 لاکھ 21 ہزار چالان اور 119.3 ملین روپے جرمانے ہوئے، سگنل کی خلاف ورزی پر 1 لاکھ 96 ہزار چالان ور 124.9 ملین روپے جرمانے کیے گئے، اوور لوڈنگ پر 2 لاکھ چالان اور 103.1 ملین روپے جرمانے ہوئے، ون وے کی خلاف ورزی اور غلط ڈرائیونگ پر 91 ہزار چالان اور 20.2 ملین جرمانے کیے گئے۔
