20 جنوری 2025
راولپنڈی
روح فورم نوجوان نسل کے قلوب و اذہان میں اتباع ،رسول کی فکر اور اعلی اقدار کی ترویج کے لیے تشکیل دیا گیا ہے۔ مفاہمتی یاداشت کا مقصد علم نافع، AI اور STEM پر کام کرنا ہے۔
ان خیالات کا اظہار روح فورم کے بانی کرنل ر مرتضی علی شاہ نے آل پاکستان پرائیویٹ سکولز مینجمنٹ ایسوسی ایشن اور روح فورم کے مابین مفاہمتی یاداشت پر دستخط کر نے کے موقع پر کیا۔ نجی تعلیمی ادارہ میں منعقد ہونے والی تقریب میں ایپسما کے مرکزی سینئر نائب صدر محمد فرقان چوہدری ، صدر شمالی پنجاب ابرار احمد خان ، ابرار الحق شاکر ، رشید اعوان ، سید عادل شاہ ، آغا شھاب مقصود ، ممبر بورڈ آف گورنرز فیڈرل تعلیمی بورڈ مسز سکینہ تاج ،عدنان نثار ، کامران سیف قریشی ، ڈاکٹر نجف، ڈاکٹر احسن، حافظ محمد یاسین ، ڈاکٹر اعجاز محمود ، عامر انور، راجہ نعمان قمر اور دیگر نے شرکت کی ۔ کرنل ر مرتضی علی شاہ نے روح فورم کے مقاصد پر روشنی ڈالی اور کہا کہ فکر اقبال کو ساتھ لیکر معاشرے میں اسوہ حسنہ کی خوشبو عام کرنا ہے۔ اللہ تعالیٰ نے انسان کو اپنا نائب بنایا ۔ اس لیےہمیں اپنے منصب اور اسکی ذمہ داریوں کا ادراک کرنا چاہیے ۔ قرآن ہماری شناخت ہے اسکا فہم اور تدبر انتہائی ضروری ہے۔ ایپسما ضلع راولپنڈی کے صدر ابرار احمد ایڈووکیٹ نے کہا کہ ہمیں اپنے اندر یہ شعور بیدار کرنا چاہیے کہ اللہ نے ہمیں کس مقصد کے لیے پیدا کیا ہے۔ علامہ اقبال فرماتے ہیں کہ زندگی کا سارا نچوڑ اللہ کی بندگی کرنا ہے۔ ہم نے خودرو پودے پیدا نہیں کرنے بلکہ ایسی نسل تیار کرنی ہے جو قرآنی فکر کی حامل ہو۔صدر شمالی پنجاب ابرار احمد خان نے کہا کہ ایپسما روح فورم کے مقاصد کے حصول میں ہرقسم کا تعاون کرنے کےلئے تیار ہے۔ روح فورم ایپسما سے وابستہ سکولز کے مستحق بچوں کو تعلیم دینے میں اپنا کردار ادا کرے گی۔
۔۔۔۔۔۔۔۔۔۔۔۔۔۔۔۔۔
