کراچی (نمائندہ خصوصی) کراچی کے علاقے ماری پور تھانہ کی حدود میں ڈکیتی اور چوری کی وارداتیں عروج پر پہنچ گئیں، ڈاکو بے لگام ہوگئے۔ ماری پور پولیس شہریوں کو تحفظ فراہم کرنے میں مکمل ناکام ہوگئی ہے۔
پیر کی صبح نو بجے کے قریب ماری پور فٹبال گراؤنڈ کے قریب دن دیہاڑے بڑی ڈکیتی کی واردات ہوئی۔ جس میں دو مسلح افراد نے محمد سلمان ولد محمد سلیم نامی شخص سے 18 لاکھ روپے کے کیش گن پوائنٹ پر لوٹ کر فرار ہوگئے۔ واضع رہے کہ متاثرہ شخص محمد سلمان پولٹری فارم کے کاروبار سے منسلک ہیں۔
اس حوالے سے ماری پور پولیس سے رابطہ کیا گیا تو پولیس حکام کا کہنا تھا کہ ڈاکوؤں کی تلاش جاری ہے۔ جبکہ دوسری جانب علاقے مکینوں نے بتایا کہ ماری پور تھانے کی حدود میں چوری اور ڈکیتی کی واردات کوئی نہیں بات نہیں ہے۔ یہ روز مرہ کا ایک معمول بن چکا ہے۔
شہریوں نے الزام لگایا کہ چوری اور رہزنی کی وارداتیں بغیر پولیس کی پشت پناہی سے ممکن نہیں ہے۔ شہریوں نے وزیراعلیٰ سندھ اور آئی جی سندھ سے مطالبہ کیا کہ ماری پور تھانے کی حدود میں چوری اور رہزنی کی وارداتوں کا تدارک کیا جائے۔
