راولپنڈی
آل پاکستان چائنیز اوورسیز یوتھ فیڈریشن کی صدر عاصمہ اسماعیل بٹ کے زیر نگرانی چیئرمین آل پاکستان چائنیز اوورسیز یوتھ فیڈریشن شجاعت علی (مرحوم)کے ایصال ثواب کے لیے راولپنڈی پریس کلب میں خصوصی دعائیہ تقریب کا انعقاد کیا گیا ۔جہاں بارگاہ الٰہی میں شجاعت علی مرحوم کے درجات بلندی کے لئے قران خوانی اور دعا کا خصوصی اہتمام کیا گیا۔ دعا میں سینیٹر مشاہد حسین سید، پاکستان مسلم لیگ ن یوتھ ونگ کے ضلعی صدر نعیم گل پاشا، مسز ممتاز ملک سمیت فنکاروں ،صحافیوں، سیاسی و سماجی شخصیات کی کثیر تعداد نے شرکت کی۔ اس موقع پر پاکستان مسلم لیگ ن کے مرکزی رہنما و سینیٹر مشاہد حسین سید نے شجاعت علی مرحوم اور صدر محترمہ عاصمہ اسماعیل بٹ کی فیڈریشن کے لیے پیش کی گئی خدمات کو بے حد سراہا۔اور کہا کہ پاکستان اور چین کے مابین ثقافت اور نوجوان نسل کی تعلیم و تربیت کے لیے فیڈریشن کے اقدامات میں ان کے ساتھ ہیں ۔محترمہ عاصمہ بٹ نے تمام شرکاء کی آمد پر شکریہ ادا کیا اور کہا کہ شجاعت علی ایک نیک دل انسان تھے۔انسانیت کی خدمت ان کا شعار تھا۔وہ ہمارے بہت اچھے ساتھی تھے۔ ان کی موجودگی سے آل پاکستان چائنیز اوورسیز یوتھ فیڈریشن نے بہت ترقی کی۔انھوں نے دوست ممالک چین اور پاکستان کی دو طرفہ ثقافت کو اجاگر کرنے میں کلیدی کردار ادا کیا ،ان کی کمی کو پورا نہیں کیا جاسکتا۔لیکن میری پوری کوشش ہوگی کہ ان کے جانے کے بعد فیڈریشن کے معاملات کو پہلے کی طرح خوش اسلوبی سے حل کروں، تاکہ پاکستان اور چین کے مابین دوستی کا سفر یونہی جاری و ساری رہے۔تقریب کے اختتام پر شرکاء نے شجاعت علی مرحوم کی مغفرت اور لواحقین کے صبر و تحمل کے لئے اجتماعی دعا کی۔
۔۔۔۔۔۔۔۔۔۔۔۔۔۔۔۔۔۔۔۔۔۔
