دھابیجی پمپنگ اسٹیشن پر بجلی کا بریک ڈاؤن ہوا ہے جس کے نیتجے میں شہر کو پانی کی قلت کا خدشہ ہے۔
کراچی واٹر اینڈ سیوریج کارپوریشن نے تصدیق کرتے ہوئے بتایا کہ کے-الیکٹرک کی جانب سے دھابیجی پمپنگ اسٹیشن کے سیکنڈ فیز پر بجلی کا بریک ڈاؤن ہوا جس کے باعث لائن نمبر 5 متاثر اور فیز 2 پمپ بند ہوگئے۔
ترجمان کارپوریشن کے مطابق پمپ کی بندش اور لائن متاثر ہونے سے کراچی کو 100 ملین گیلن پانی کی قلت پیدا ہو سکتی ہے، متاثر لائن کی مرمت کا کام ہنگامی بنیادوں پر کیا جا رہا ہے۔
واضح رہے کہ 14 نومبر کو کراچی واٹر اینڈ سیوریج کارپوریشن نے بتایا تھا کہ دھابیجی پمپنگ اسٹیشن کے تھری پمپ ہاؤس میں گزشتہ رات 9 بجے پیش آنے والے بجلی کے بریک ڈاؤن کے باعث شہر کو اب تک 40 ملین گیلن پانی کی کمی کا سامنا ہے۔
ترجمان کا کہنا تھا کہ بریک ڈاؤن کا سبب کیبل فالٹ ہے جس کے باعث کے تھری پمپ ہاؤس کے دو اہم پمپس بند ہوگئے، 14 گھنٹے گزرنے کے باوجود بجلی فراہم کرنے والی کمپنی کی جانب سے کیبل فالٹ تاحال دور نہیں کیا جا سکا۔
حکام نے بتایا تھا کہ وہ کے-الیکٹرک انتظامیہ سے مسلسل رابطے میں ہیں جبکہ بجلی کمپنی نے فالٹ کی جلد مرمت کی یقین دہانی کروائی ہے، بجلی کی بحالی کے فوراً بعد دھابیجی پمپنگ اسٹیشن کا پمپنگ نظام معمول پر آ جائے گا جس کے بعد پانی کی فراہمی بتدریج بہتر ہوگی۔
