برازیل کی معروف باڈی بلڈر اور فٹنس انفلوئنسر ڈیانا ایریاز 39 برس کی عمر میں مبینہ طور پر اپنے ہائی رائز اپارٹمنٹ سے گر کر جان کی بازی ہار گئیں۔
بین الاقوامی میڈیا رپورٹس کے مطابق ڈیانا ایریاز کے انسٹاگرام پر دو لاکھ سے زائد فالوورز تھے، ڈیانا کی لاش ریو ڈی جنیرو میں واقع بلند عمارت کے باہر سے ملی۔
واقعے سے قبل امدادی حکام کو ڈیانا ایریاز کی رہائش گاہ پر بلایا گیا تھا جہاں وہ جسم پر متعدد زخموں کے ساتھ پائی گئی تھیں، انہیں فوری طور پر اسپتال منتقل کیا گیا، تاہم رپورٹس کے مطابق وہ بغیر باضابطہ ڈسچارج ہوئے اسپتال سے چلی گئی تھیں۔
حکام کی جانب سے ڈیانا کی موت کے سلسلے میں پیش آنے والے واقعات کی تفصیل تاحال جاری نہیں کی گئی جبکہ ریو ڈی جنیرو پولیس نے معاملے کی مزید تحقیقات شروع کر دی ہیں۔
ڈیانا ایریاز برازیل کی فٹنس کمیونٹی میں نہایت مقبول تھیں اور وہ سوشل میڈیا پر ورک آؤٹ روٹین، لائف اسٹائل ٹپس اور باڈی بلڈنگ سے متعلق معلومات شیئر کرتی رہتی تھیں۔
حکام اس المناک واقعے کی وجوہات جاننے کے لیے تحقیقات جاری رکھے ہوئے ہیں۔
