سکھر : صوبائی وزیرِ بلدیات سندھ سید ناصر حسین شاہ نے بندر روڈ کی سائیڈ پر روڈ کی تعمیر اور ڈرینج لائن کی تنصیب کے اہم ترقیاتی منصوبے کا سنگِ بنیاد رکھ دیا، منصوبے کے تحت بندر روڈ پر دعا چوک سے واٹر ورکس تک سڑک کی تعمیرِ نو اور ایک کلومیٹر طویل ڈرینج لائن بچھائی جائے گی۔ یہ منصوبہ ایک سال کے اندر مکمل کیا جائے گا۔ اس موقع پر چیئرمین ضلع کونسل سکھر سید کمیل حیدر شاہ رکنِ قومی اسمبلی نعمان اسلام شیخ، ڈپٹی میئر سکھر ڈاکٹر ارشد مغل، ڈپٹی کمشنر سکھر نادر شہزاد خان، ایس ایس پی سکھر اظہر مغل، اسسٹنٹ کمشنر سٹی سمیت بلدیاتی و ضلعی افسران بھی موجود تھے۔سید ناصر حسین شاہ نے کہا کہ صوبائی حکومت شہری سہولیات میں بہتری کے لیے ترجیحی بنیادوں پر اقدامات کر رہی ہے، اور سکھر سمیت صوبے کے دیگر شہروں میں ترقیاتی کام تیزی سے جاری ہیں۔
