فلائی ایڈیل کا لاہور سے پروازوں کا آغاز
سعودی بجٹ ایئرلائن کی پاکستان کے پانچویں شہر تک توسیع
سعودی عرب کی تیزی سے ترقی کرنے والی بجٹ ایئرلائن فلائی ایڈیل نے ایک پُر وقار تقریب میں لاہور کے لیے باقاعدہ شیڈول پروازوں کا آغاز کر دیا ہے، جو پاکستان میں ایئرلائن کی پانچویں منزل کے طور پر ایک اہم سنگِ میل کی حیثیت رکھتا ہے۔
ریاض کے کنگ خالد انٹرنیشنل ایئرپورٹ سے روانہ ہونے والی پرواز F3 655 پاکستان کے دوسرے بڑے شہر لاہور پہنچی، جہاں اس کا روایتی واٹر کینن سلامی کے ساتھ پرجوش استقبال کیا گیا۔ بعد ازاں ایئرپورٹ اور ایئرلائن حکام سمیت افتتاحی پرواز کے عملے کی موجودگی میں کیک کاٹنے کی تقریب منعقد ہوئی، جس نے اس موقع کو یادگار بنا دیا۔
نئی ہفتہ وار دو پروازوں کے اضافے کے ساتھ، فلائی ایڈیل کی سعودی عرب اور پاکستان کے درمیان کل پروازوں کی تعداد پانچ شہروں میں ہفتہ وار 18 شیڈول سروسز تک پہنچ گئی ہے۔ ان شہروں میں کراچی، اسلام آباد، پشاور اور سیالکوٹ شامل ہیں — جنہیں اس سال فروری سے مرحلہ وار طور پر فلائی ایڈیل کے نیٹ ورک میں شامل کیا گیا ہے۔
فلائی ایڈیل کے چیف ایگزیکٹو آفیسر اسٹیون گرین وے نے کہا:
صرف آٹھ ماہ کے قلیل عرصے میں پاکستان کے ایک شہر سے بڑھ کر پانچ شہروں تک اپنے فضائی آپریشنز کو وسعت دینا ایک قابلِ ذکر کامیابی ہے۔ کسی بھی نئی مارکیٹ میں قدم جمانا ایک مرحلہ وار عمل ہوتا ہے، تاہم ہماری آپریشنل اور کمرشل ٹیموں نے انتہائی مختصر مدت میں منصوبہ بندی، آغاز، توسیع اور درکار بنیادی ڈھانچے کی تیاری جیسے تمام مراحل نہایت کامیابی سے مکمل کیے — تاکہ فروخت، مارکیٹنگ اور پروازوں کی تشہیر کا مؤثر نظام فوری طور پر قائم کیا جا سکے۔
فلائی ایڈیل کے ہیڈ آف سیلز فاروق احمد نے لاہور کے علامہ اقبال انٹرنیشنل ایئرپورٹ پر آمد کے موقع پر اپنے خیالات کا اظہار کرتے ہوئے کہا:
پاکستان فلائی ایڈیل کے لیے ایک نمایاں کامیابی کی مثال بن چکا ہے۔ انتہائی کم عرصے میں ہم نے اس مارکیٹ میں غیر معمولی اعتماد حاصل کیا ہے ٹریول پرووائڈرز کے ساتھ مضبوط روابط کے ساتھ ساتھ مسافروں میں برانڈ پر اعتماد اور ترجیح کا رجحان ہے۔ بطور ایک نسبتاً نئے مگر تیزی سے ابھرتے ہوئے کیریئرکے ساتھ پاکستان جیسی تیز رفتار مارکیٹ میں یہ کامیابی ہمارے عزم اور مؤثر حکمتِ عملی کا ثبوت ہے۔ ہم ملک میں اپنے وسیع تر نیٹ ورک کے ذریعے پارٹنرشپس کو مزید فروغ دینے اور صارفین کو بہتر سفری سہولیات فراہم کرنے کے لیے پرعزم ہیں۔
لاہور، پاکستان کے صوبہ پنجاب کا دارالحکومت اور ملک کا دوسرا بڑا شہر ہے، جو شعر و ادب، فلسفہ اور فنونِ لطیفہ کے مرکز کے طور پر پہچانا جاتا ہے۔ یہ شہر نہ صرف تعلیم، اشاعت اور ثقافت کا ایک اہم گہوارہ ہے بلکہ اپنی ادبی و علمی وراثت کے باعث یونیسکو کے (City of Literature)شہرِ ادب کے طور پر بھی تسلیم کیا گیا ہے۔
لاہور روٹ سعودی عرب اور پاکستان کے درمیان سفر کرنے والے کاروباری مسافروں، محنت کشوں اور مملکت میں مقیم بڑی پاکستانی کمیونٹی کی ضروریات کو پورا کرے گا، جبکہ ایئرلائن اپنی پالیسی کے مطابق مسافروں کو بجٹ میں بہترین سفری سہولیات کی فراہمی کےلیے کوشاں ہے ۔
پاکستان آنے اور جانے والی فلائی ایڈیل کی تمام پروازیں ایئربس A320 طیاروں پر 186 نشستوں والی یکساں اکانومی کلاس میں چلائی جاتی ہیں، جو مسافروں کو آرام دہ اور ہم آہنگ سفری تجربہ فراہم کرتی ہیں۔
فلائی ایڈیل اس وقت ریاض، جدہ اور دمام کے اہم مراکز سے اپنے جدید ایئربس A320 طیاروں پر مشتمل 42 جہازوں کے ذریعے مشرقِ وسطیٰ، شمالی افریقہ، یورپ اور جنوبی ایشیا کے 30 سے زائد مخصوص اوقات اور پورے سال کھلے رہنے والے مقامات کے لیے پروازیں چلا رہا ہے۔
سعودی وژن 2030 کے مطابق، فلائی ایڈیل نے ایک جامع توسیعی حکمتِ عملی ترتیب دی ہے، جس کے تحت ایئرلائن کا ہدف ہے کہ اپنے نیٹ ورک کو تین گنا وسعت دیتے ہوئے 2030 تک اپنی پروازوں کے لیے 100 سے زائد جدید طیارے متعارف کراتے ہوئے 100 سے زیادہ عالمی مقامات کو اپنی منزلوں میں شامل کرے ۔
