میرپورخاص
رپورٹ
تحسین احمد خان
میرپورخاص کے نواحی شہر میرواہ گورچانی کے رہائشی ایک غریب مزدور کے بیٹے نے ضلع میرپورخاص میں ہونے والے میڈیکل ٹیسٹ میں شاندار کامیابی حاصل کرتے ہوئے نویں پوزیشن حاصل کر لی۔ نوجوان جسونت کمار میگھواڑ نے 88 فیصد نمبر حاصل کیے۔
تفصیلات کے مطابق گزشتہ ہفتے کو لیاقت یونیورسٹی آف میڈیکل اینڈ ہیلتھ سائنسز (لمس) جامشورو اور پیپلز میڈیکل کالج نوابشاہ کے لیے ہونے والے میڈیکل انٹری ٹیسٹ میں میرواہ گورچانی کے نواحی گاؤں لال بخش رستمانی کے رہائشی جسونت کمار ولد لوڻو مل میگھواڑ نے ضلع میرپورخاص میں نمایاں کامیابی حاصل کرتے ہوئے نویں نمبر پر 88 فیصد یعنی 180 میں سے 159 نمبر حاصل کئے-میرواہ گورچانی میں صحافیوں سے گفتگو کرتے ہوئے جسونت کمار میگھواڑ نے بتایا کہ انہوں نے میٹرک اور انٹرمیڈیٹ کی تعلیم گورنمنٹ بوائز ہائیر سیکنڈری اسکول میرواہ گورچانی سے حاصل کی۔ان کے والد شوگر مل میں مزدور ہیں اور وہ ایک غریب گھرانے سے تعلق رکھتے ہیں۔ انہوں نے مزید بتایا کہ وہ عمرکوٹ کے ایک پرائیویٹ انسٹیٹیوٹ میں روزانہ 10 سے 12 گھنٹے میڈیکل ٹیسٹ کی تیاری کرتے تھے۔انہوں نے کہا کہ مجھے یقین تھا کہ میں جس محنت سے پڑھ رہا ہوں اس کا پھل ضرور ملے گا۔ امید ہے کہ میرٹ کی بنیاد پر میری سلیکشن لیاقت میڈیکل یونیورسٹی جامشورو میں ہو جائے گی۔ میں ڈاکٹر بن کر غریب اور مستحق لوگوں کا علاج کروں گا۔ان کے والد لونو مل میگھواڑ نے بتایا کہ انہیں اپنے بیٹے کی کامیابی پر بے حد خوشی ہے۔بغیر کسی سفارش کے میرے بیٹے نے ضلع میں نویں نمبر پر کامیابی حاصل کی ہے۔ میں العباس شوگر مل میں مزدوری کرتا ہوں لیکن آج بیٹے کی محنت پر مجھے فخر ہے۔واضح رہے کہ گزشتہ ہفتے پبلک اسکول میرپورخاص میں منعقدہ میڈیکل ٹیسٹ میں 1500 سے زائد طلبہ و طالبات نے حصہ لیا تھا۔ضلع میرپورخاص کے لیے 25 نشستیں لمس جامشورو اور 17 نشستیں پیپلز میڈیکل کالج نوابشاہ کے لیے مختص کی گئی ہیں۔
