معروف صوفی گلوکارہ عابدہ پروین نے اپنی صحت کے حوالے سے سوشل میڈیا اور بعض ذرائع ابلاغ میں گردش کرنے والی افواہوں کی سختی سے تردید کرتے ہوئے کہا ہے کہ میں بالکل صحت مند اور تندرست ہوں۔ویٹامن اور سپلیمنٹس خریدیں
عابدہ پروین کی ٹیم کی جانب سے جاری بیان میں کہا گیا کہ ہم نے پہلے بھی وضاحت دی تھی، لیکن محسوس ہو رہا ہے کہ اسے دوبارہ کہنا ضروری ہے، عابدہ پروین بالکل صحت مند اور الحمدللہ تندرست ہیں۔
ٹیم نے بیان میں مزید کہا کہ حالیہ دنوں میں سوشل میڈیا پر پھیلنے والی افواہوں کو حد سے زیادہ پروان چڑھائی گئی، بعض میڈیا ادارے بغیر تصدیق کے خبریں شائع کر رہے ہیں، مداحوں سے اپیل ہے کہ وہ صرف مستند ذرائع سے معلومات حاصل کریں اور بلا تصدیق افواہوں کو آگے نہ بڑھائیں۔
عابدہ پروین کی ٹیم نے میڈیا اداروں سے بھی درخواست کی کہ وہ ان کی صحت کے حوالے سے پھیلائی گئی بے بنیاد خبریں فوری طور پر ہٹائیں۔
ٹیم نے کہا کہ ہم اپنے مداحوں سے پیدا شدہ تشویش اور انتشار پر معذرت خواہ ہیں، براہ کرم انہیں اپنی دعاؤں میں یاد رکھیں، شکریہ۔
اس بیان کے بعد عابدہ پروین کے مداحوں نے سوشل میڈیا پر خوشی کا اظہار کیا اور انہیں صحت مند زندگی کی نیک تمناؤں کے ساتھ یاد رکھا۔
