کچھ دنوں سے سوشل میڈیا پر ایک نوٹیفکیشن کے ذریعے دعویٰ کیا جا رہا ہے کہ پاکستانی حکام نے بالی وڈ اداکارسلمان خان (salman khan)کو انسدادِ دہشت گردی ایکٹ 1997 کے فورتھ شیڈول میں شامل کر لیا ہے۔
وائرل دستاویز کے مطابق یہ اقدام اداکار کی جانب سے مبینہ طور پر سعودی عرب میں تقریب کے دوران بلوچستان سے متعلق بیان دینے کے بعد کیا گیا۔
تاہم، فیکٹ چیک میں یہ دعویٰ مکمل طور پر جھوٹا اور من گھڑت ثابت ہوا۔بلوچستان حکومت کے ترجمان اور سرکاری حکام کے مطابق، یہ نوٹیفکیشن جعلی ہے اور صوبائی ہوم ڈپارٹمنٹ کی طرف سے جاری نہیں کیا گیا۔
بلوچستان کے ہوم ڈپارٹمنٹ کے سیکشن آفیسر جاوید علی نے واضح کیا کہ 16 اکتوبر کو جاری ہونے والے ایک نوٹیفکیشن میں کچھ افراد کے نام فورتھ شیڈول میں شامل کیے گئے تھے، تاہم بعد میں کسی نے اسی دستاویز میں تبدیلی کر کے سلمان خان کا نام شامل کر دیا۔ ان کے مطابق یہ دستاویز مکمل طور پر جعلی اور ترمیم شدہ ہے۔
ایک سینیئر سرکاری اہلکار نے نام ظاہر نہ کرنے کی شرط پر بتایا کہ وائرل نوٹیفکیشن میں متعدد گرامر اور اسپیلنگ کی غلطیاں نمایاں ہیں، جو اس کی اصلیت پر سوال اٹھاتی ہیں۔ مثال کے طور پر، لفظ ’’affiliated‘‘ کو غلط طور پر ’’aftilisted‘‘ لکھا گیا ہے، جب کہ نوٹیفکیشن میںthe following names لکھا گیا ہے لیکن فہرست میں صرف ایک ہی نام موجود ہے۔
ڈیجیٹل فورنزک پلیٹ فارم اٹیسیٹیو(Attestiv) کے مطابق، اس دستاویز کو 93 کا ”ٹیمپر اسکور“ دیا گیا، جو واضح طور پر بتاتا ہے کہ یہ ڈیجیٹلی ایڈٹ شدہ فائل ہے۔
