مشہور ڈرامہ “جن کی شادی اُن کی شادی” کے حوالے سے حال ہی میں سامنے آنے والے تنازع پر اس کے مصنف سید نبیل کا ردِعمل سامنے آ گیا ہے۔
یہ ڈرامہ اپنی منفرد ہارر کامیڈی کہانی کے باعث ناظرین میں بے حد مقبول ہے، تاہم حال ہی میں معروف اداکار شمعون عباسی کے ایک دعوے نے مداحوں کو حیران کر دیا۔
شمعون عباسی کا کہنا تھا کہ “جن کی شادی اُن کی شادی” دراصل ان کا لکھا ہوا اسکرپٹ ہے۔ ان کے مطابق کہانی کا بنیادی تصور (concept) انہوں نے دیا تھا، وہ خود اس پراجیکٹ کو ڈائریکٹ کرنے والے تھے، اور ان کا نام ابتدائی اسکرپٹ میں شامل تھا مگر بعد میں انہیں کریڈٹ نہیں دیا گیا۔
اس حوالے سے مصنف سید نبیل نے وضاحت کرتے ہوئے شمعون عباسی کے مؤقف کی جزوی تصدیق کی۔ ان کا کہنا تھا کہ شمعون عباسی درست ہیں کہ کہانی کا بنیادی خیال ان کا تھا، تاہم پورا اسکرپٹ میں نے تحریر کیا اور کہانی کی تشکیل و سمت بطور مصنف میری ہے۔
سید نبیل نے مزید کہا کہ اس ڈرامے کی کامیابی میں شمعون عباسی، میں خود اور ڈائریکٹر سیفی حسن تینوں کا برابر کا حصہ ہے۔
واضح رہے کہ “جن کی شادی اُن کی شادی” اپنی انوکھی کہانی، بہترین مکالموں اور متاثر کن اداکاری کی بدولت ناظرین سے زبردست داد سمیٹ رہا ہے۔
