پاکستان اور چین کے درمیان ثقافتی اور فلمی تعلقات کو نئی جہت دینے کے لیے ایچ کے سی انٹرٹینمنٹ نے مانڈوی والا انٹرٹینمنٹ کے اشتراک سے اعلان کیا ہے کہ چینی اینیمیٹڈ بلاک بسٹر ’نی ژا 2‘ پاکستان بھر میں جمعہ، 31 اکتوبر 2025 سے ریلیز کی جائے گی۔
یہ اعلان ایک تاریخی موقع کی حیثیت رکھتا ہے کیونکہ کئی برسوں بعد کوئی چینی فلم پاکستانی سینماؤں کی زینت بننے جا رہی ہے۔ ’نی ژا 2‘ سرحد پار فلمی تعاون کی نئی شروعات قرار دی جا رہی ہے۔
یہ فلم پہلے ہی عالمی سطح پر دھوم مچا چکی ہے۔ ’نی ژا 2‘ نہ صرف دنیا کی سب سے زیادہ کمائی کرنے والی اینیمیٹڈ فلم ہے بلکہ چین کی تاریخ میں سب سے بڑی بلاک بسٹر بھی ثابت ہوئی، جس نے حیران کن طور پر 2.2 ارب امریکی ڈالر کا بزنس کیا۔
پاکستانی سینماؤں میں اس فلم کی نمائش شائقین کو ایک شاندار بصری اور جذباتی تجربہ فراہم کرے گی۔
فلم کے پریمیئر کی تقریب میں چینی سفارت خانے کے منسٹر کاؤنسلر ہز ایکسی لینسی شی یوان چیانگ نے خصوصی شرکت کی، جس سے اس ایونٹ کی ثقافتی اور سفارتی اہمیت مزید بڑھ گئی۔
فلم کو ناظرین کی سہولت کے لیے دو زبانوں میں پیش کیا جائے گا — چینی زبان کے ساتھ انگریزی سب ٹائٹلز اور اردو ڈب شدہ ورژن۔
انکور فلمز کی منیجنگ ڈائریکٹر جویس لی نے کہا:
“’نی ژا 2‘ ایشیا میں ایک تاریخی فلم ثابت ہوئی ہے۔ ہمیں خوشی ہے کہ ہم ایچ کے سی انٹرٹینمنٹ اور مانڈوی والا انٹرٹینمنٹ کے ساتھ مل کر یہ شاہکار پاکستانی ناظرین تک پہنچا رہے ہیں۔ یقین ہے کہ اس کی متاثر کن کہانی پاکستانی عوام کے دل جیت لے گی۔”
سینیٹر سلیم مانڈوی والا نے اس موقع پر کہا:
“یہ صرف ایک فلم کی ریلیز نہیں بلکہ پاکستان اور چین کی مضبوط دوستی کا ثقافتی اظہار ہے۔ ہماری قیادت ہمیشہ اس تعلق کو مزید مستحکم بنانے کے لیے کوشاں رہی ہے۔”
اسی طرح وزیراعظم کے مشیر برائے سیاحت و نیشنل کوآرڈی نیٹر سردار یاسر الیاس نے کہا:
“یہ ریلیز علاقائی سینما کے لیے ایک گیم چینجر ہے۔ جس طرح چین کی سب سے بڑی فلم پاکستان آ رہی ہے، اسی طرح پاکستان کی بلاک بسٹر فلم ’دی لیجنڈ آف مولا جٹ‘ کی ریلیز چین میں ہونے جا رہی ہے — یہ باہمی فلمی تعاون کا ایک نیا دور ہے۔”
