ترکیہ میں طلاق کا ایک انوکھا معاہدہ سامنے آیا ہے ، یہ عجیب و غریب معاہدہ خبروں کی زینت بنا ہوا ہے۔
غیر ملکی خبر ایجنسی کے مطابق ایک ترک شہری نے طلاق کے معاہدے میں اپنی اہلیہ کو 2 بلیوں کی دیکھ بھال کیلئے ہر 3 ماہ بعد 10 ہزار لیرا ادا کرنے پر رضامندی ظاہر کر دی۔
استنبول کے رہائشی بوغرابی نے اپنی اہلیہ ایزگی بی سے باہمی رضامندی کے ساتھ طلاق کیلئے درخواست دائر کی تھی تاہم اس طلاق میں دلچسپ بات یہ ہے کہ فریقین نے ایک دوسرے سے کسی قسم کا مالی معاوضہ یا گزر بسر الاؤنس طلب نہیں کیا۔
فریقین نے طلاق کے کاغذات میں ایک منفرد شق شامل کی جس کے مطابق بوغرا بی کی ملکیت میں موجود 2 بلیاں ایزگی بی کے پاس رہیں گی، وہ ہر 3 ماہ بعد بلیوں کی نگہداشت کے اخراجات کیلئے 10 ہزار لیرا ادا کریں گے۔
ترکیہ میں یہ معاہدہ الاؤنس کی نئی قسم قرار دیا جا رہا ہے جو طلاق کے بعد پالتو جانوروں کی مالی کفالت کے مقدمات کیلئے مثال بن سکتی ہے۔
