پاکستانی شوبز انڈسٹری کی معروف سینئر اداکارہ نادیہ افگن، جو اکثر ڈراموں میں ماں کے کرداروں میں نظر آتی ہیں، نے اپنی ایک انسٹاگرام اسٹوری میں معاشرے کی ایک تلخ حقیقت پر بات کرتے ہوئے کہا ہے کہ وہ اپنی وفات کے وقت یہ وصیت چھوڑ کر جائیں گی کہ ان کے جنازے پر کسی کو کھانا نہ دیا جائے۔
اداکارہ نے لکھا کہ “جس نے آنا ہے وہ آ جائے، اور جس نے نہیں آنا، وہ نہ آئے، لیکن جنازے کو دعوت یا تقریب نہ بنایا جائے۔”
نادیہ افگن نے بتایا کہ جب ان کے والد کا انتقال ہوا تو انہیں سب سے زیادہ دکھ اس بات کا ہوا کہ لوگ افسوس سے زیادہ انتظامات کے بارے میں پوچھ رہے تھے۔ انہوں نے کہا کہ “کالونی کے انچارج میرے پاس آئے اور سب سے پہلا سوال یہی کیا کہ کرسیاں، ٹینٹ اور کھانے کا انتظام کہاں سے ہوگا۔”
اداکارہ نے بتایا کہ اس دن وہ غم کے باوجود رات گئے تک مہمانوں کی خدمت میں مصروف رہیں، بار بار یہی پوچھتی رہیں کہ “کیا آپ نے کھانا کھایا؟ کسی چیز کی ضرورت تو نہیں؟” — اور اسی سوچ نے انہیں یہ احساس دلایا کہ ہم نے دکھ کے موقع کو بھی ایک سماجی تقریب بنا دیا ہے۔
