پاکستان کے مشہور اداکار احد رضا میر کا حالیہ انٹرویو سوشل میڈیا پر خوب توجہ حاصل کر رہا ہے، جس میں انہوں نے ہنستے ہوئے کہا کہ ممکن ہے مستقبل میں وہ اپنا چہرہ مصنوعی ذہانت (AI) کو فروخت کر دیں۔
امریکا میں مداحوں کے ساتھ ایک ملاقات کے دوران احد رضا میر نے اداکاری، ٹیکنالوجی اور اپنے آنے والے منصوبوں پر کھل کر گفتگو کی۔
ان کا کہنا تھا کہ مصنوعی ذہانت ایک دلچسپ مگر خوف پیدا کرنے والا رجحان ہے۔ مزاحیہ انداز میں بات کرتے ہوئے انہوں نے کہا، “کیا پتا چند سال بعد میں اپنا چہرہ اے آئی کو بیچ دوں تاکہ وہ میری جگہ پرفارمنسز خود بنائے۔”
اداکار نے مزید مسکراتے ہوئے کہا، “پھر ایک سال میں میرے دس ڈرامے ریلیز ہوں گے اور میں سکون سے گھر بیٹھا رہوں گا۔”
احد رضا میر کی اس بات پر حاضرین قہقہوں میں پھوٹ پڑے۔ اداکار نے یہ بھی تسلیم کیا کہ جدید ٹیکنالوجی تیزی سے شوبز انڈسٹری کا نقشہ بدل رہی ہے اور آنے والے سالوں میں اس کے اثرات مزید نمایاں ہوں گے۔
